Misterio di e 2.7 biyon florin extra na entrada! 

Despues cu partido MEP ultimamente a cuestiona severamente e 2.7 biyon florin EXTRA di placa di pueblo cu a ser malgasta durante e ultimo 7 añanan door di Gabinete Mike Eman, awor diripiente un di e politiconan manda di e partido aki, esta Marlon Sneek a lanta for di soño y den un salto mortal a core bin padilanti y produci un lista di supuesto proyectonan ehecuta pa su gobierno di AVP. Sinembargo ta tristo pa constata cu e suma di gastonan na e proyectonan aki a yega na apenas 76.8 miyon florin, cu ta inclui e ponemento di klinkers den algun  bario, algun renobacion di schoolnan, renobacion di edificio di DIMAS y algun proyecto di embeyecimento di casnan social cu gobierno di MEP a construi den pasado. Mester remarca cu sr. Sneek tambe a trece padilanti cu su gobierno durante e 7 añanan aki a duna reparatietoeslag y schoolkinderentoeslag na esunnan cu ta cobra onderstand y a percura pa algun promocion na empleadonan publico. Y ta te ey el a yega tambe!

Ningun construccion nobo
Echo ta cu un biaha mas sr. Sneek mes por a comproba cu su gobierno – ricibiendo 2.7 biyon florin extra na entrada - practicamente no a construi ningun edificio nobo durante e ultimo 7 añanan: Ningun cas social, ningun school nobo, ningun edificio di gobierno, ningun facilidad deportivo, ningun warda di polis, ningun cas pa anciano. Siguramente e proyectonan grandi cu actualmente ta den ehecucion, esta e expansion di Hospital, e Green Corridor y e 2 MFAnan na Noord y Paradera no a ser menciona den e lista door di sr. Sneek, ya cu e mes a bira consciente cu e inversionnan den e proyectonan PPP aki absolutamente NO ta core riba presupuesto di gobierno ya cu nan lo bay cuminsa wordo paga aki algun aña mediante e medida di Financial Transfer Tax cu gobierno kier bin cun’e riba lomba di pueblo.

No tin hustificacion
Sinembargo den su ignorancia sr. Sneek y hunto cun’e varios otro politico di AVP te ainda no kier comprende e significacion di malgastamento di 2.7 biyon florin extra di placa di pueblo door di Gabinete Mike Eman, sin cu nan por hustifica esaki den un forma transparente. Awor si duna sr. Sneek e beneficio di duda y agrega un 200 miyon florin (reparatietoeslag, schoolkinderentoeslag, promocion) na e suma di 76.8 miyon florin, esta e gastonan di “proyectonan” cu e mes a menciona riba su lista y cual ta suma den total na 276.8 miyon florin, anto ainda ta keda un suma di 2.4 biyon florin cu sr. Sneek no por hustifica na kico esaki a bay.

Menos cu 1% na inversion
Echo ta cu e inversionnan di Gabinete Mike Eman a resulta pober, pero hopi pober mes cu te hasta CAFT den su rapport di 29 december 2014 a declara cu menos cu 1% di e gastonan total di gobierno a ser usa pa inverti den e pais aki na 2014 y tambe despues den e rapport di IMF di dia 13 di februari 2015 a enfatisa cu tin un tardansa enorme den ehecucion di proyectonan di gobierno (“investment delays”).
Pues e lista di “proyectonan” ehecuta door di Gabinete Mike Eman y vocifera pa sr. Sneek a resulta den un cos di hari y caminda ta bisto cu su persona kier manipula y tuma pueblo haci un biaha mas. Echo ta cu lo ta bon pa sr. Sneek biba cu e realidad cu un gran parti di e suma di 2.7 biyon florin extra cu su gobierno di AVP a ricibi no por wordo hustifica cu e inversionnan den klinkers, algun renobacion di school y embeyecimento di algun bario na Aruba. Pues te ainda pueblo no por wak y fula unda su placa a bay y cual misterio lo keda esun di mas grandi di e ultimo 7 añanan.

Expresionnan haci den e articulo aki no necesariamente ta refleha opinion di ArenaPoliti.co