Minister Sevinger na brug nobo di ‘Green Corridor’. 
Diaranson ultimo a cuminsa arma e prome parti di e brug. 

ORANJESTAD - Diaranson mainta tempran Minister encarga cu infrastructura di Pais Aruba, Benny Sevinger, tabata na sitio di construccion di e brug nobo di na Pos Chikito, net un poco panord di e brug di e brug existente. E brug ‘bieu’, cu ta ta data for di mey mey di siglo pasa, ta e conexion entre Pabou y Pariba di nos pais. Cu construccion di ‘Green Corridor’, loke ta encera un ‘vierbaansweg’ ta haci cu e brug bieu, ta mucho chikito pa esaki. Mirando esaki gobierno, diseñador y planeadonan a inclui den plan un brug nobo na Pos Chikito. Den e diseñonan a tene na cuenta tambe cu e brug bieu por wordo uza pa peaton y consecuentemente ta bay forma parti di un Linear Park na Pos Chikito.

“Manera e nomber di e proyecto aki ta bisa,” Minister Sevinger ta splica, “Green Corridor, a tene cuenta cu tur naturalesa cu ta den e area aki y anexo na e caminda aki. Cu e proyecto aki nos a purba di minimalisa e efecto riba naturalesa y unda tin influencia mes, nos ta purba planta bek loke a wordo kita pa construccion di e brug aki.” Hopi ta puntra e motibo di a yama e proyecto ‘Green Corridor’. Den e diferente plannan durante aña y decadanan atras, tabata tin varios opcion pa haci e conexion entre pariba y pabou di brug uno mas eficiente. Mayoria di e diseñonan tabata haci cu e vierbaansweg lo a pasa cerca of mey mey di cunucu y areanan di importancia natural. E opcion cu a wordo scogi pe, esun cu na e momentonan aki ta bou construccion, ta e opcion mas ‘green’, pa motibo cu e influencia ta minimal riba medio ambiente.

Segun Minister Sevinger ta splica, te hasta den diseño di e brug a scohe pa uno cu ta pasa riba e mangrovenan. “Pesey mes e diseño di e brug aki ta un tipo di ‘hangbrug’, dus e parti di e superficie riba cua e autonan ta bay pasa no ta riba e kolomnan, pero ta colga na loke nos ta yama un ‘arco’ cu awe a pone e prome pida di dje. Dus e ta bay ta un brug colga na un ‘arco’ cu ta bay wanta e caminda pa asina e pasa over di e mangrovenan y conservanan.”

Segun splicacion di e titular encarga cu infrastructura, na unda mester a kita algun mangrove, a haci esaki conforme un plan cu tin cu ambientalistanan cu ta mira con esaki mester sosode. Gobierno di su banda a contrata conseheronan experto riba e materia aki cu a haci inspeccion y a delinea con e trabou mester wordo haci. “E proyecto aki ta cumpli totalmente cu e normanan internacional di medio ambiente,” Sevinger a splica, “y esey nos ta haciendo akinan tambe.”

Minister Sevinger tabata na e sitio di construccion hunto cu su colega minister Mike Eman y hunto a presencia un momento importante den ehecucion di e proyecto ‘Green Corridor’, esta e prome instalacion di e brug nobo.

Expresionnan haci den e articulo aki no necesariamente ta refleha opinion di ArenaPoliti.co