Un di e hopi areanan di gobernacion cu dr. Mito Croes a laga un stempel grandi atras, ta e area di enseñansa. Den bista di dr. Mito Croes, enseñansa ta e miho instrumento cu un pais tin pa stimula desaroyo personal y di henter un pais. Ta pesey como e prome minister di enseñansa di Aruba despues cu Aruba a haya su Status Aparte, dr. Mito Croes a cuminsa cu un cantidad di cambio structral den enseñansa, pa enseñansa por hunga e rol di motor di desaroyo pa Aruba.

UNIVERSIDAD DI ARUBA
Dr. Mito Croes tabata convenci cu pa falta di oportunidad pa bay por studia na nivel di enseñansa superior, hopi talento Arubiano tabata keda sub-desaroya. Aruba mester a desaroya su propio cuadro di profesional pa nos mes por maneha nos desaroyo y gui'e den e direccion cu nos mes a scohe pe. Te na e momento ey Aruba tabata depende di expertonan Hulandes pa haci hopi trabou pa nos. Den bista di dr. Mito Croes, nos desaroyo lo cambia na momento cu jiunan di tera haci e escohencianan cu te na e momento ey otronan tabata haci pa nos. Ta pesey tambe nos a scohe pa ta "baas den propio cas". Cu e metanan ey dr. Mito Croes a cuminsa e proceso pa lanta un propio universidad na Aruba. Hopi hende no a haya ta necesario pa Aruba tin un propio universidad como pais chikito. Mas ainda pa haci esaki mey mey di e crisis enorme cu nos pais tabata pasa aden. Dr. Mito Croes sinembargo a insisti y a logra. Dos aña despues Universidad di Aruba a habri. Awe, casi 30 aña despues, masha hopi hoben a studia y gradua na Universidad di Aruba.

ENSEÑANSA UN DERECHO
Hunto cu creasion di Universidad di Aruba, dr. Mito Croesa crea e facilidad pa tur hoben cu kier bay studia, por haya financiamento pa studia. Studiamento ya no tabata un previlegio pa un par, pero un oportunidad pa tur. Un beka pa studia ya no tabata un fabor politico, pero un derecho ta tur hoben na Aruba.
Rene Herde': "Esaki ta djis dos ehempel di e trabou grandi cu dr. Mito Croes a haci den enseñansa. Su insistencia pa renoba enseñansa y haci enseñansa e motor di nos desaroyo, a hiba na hopi otro cambio. Pero ainda falta hopi pa haci. E ta nos tarea como AVP pa continua cu e trabou den enseñansa cu dr. Mito Croes a haci for di 1986 como e prome minister di enseñansa di Aruba."

Expresionnan haci den e articulo aki no necesariamente ta refleha opinion di ArenaPoliti.co