Mito Croes a yuda pais Aruba cu conseho den su retonan grandi. 

ORANJESTAD – Pa Prome Minister Mike Eman tabata un momento hopi dificil dirigi su mes na prensa, dunando informacion di e bida y logronan politico di su gran amigo mr. dr. Mito Croes, kende a fayece diadomingo, 7 di augustus, na su cas na Paradera. Rondona pa colega Minister, colaboradornan y esnan cu a conoce Mito Croes, e mandatario a splica cu e kier comparti cu pueblo un noticia cu a conmove y sacudi pueblo di Aruba diadomingo ultimo. “Diadomingo nos a perde un gran yiu di tera, un amigo grandi di Aruba, pero tambe un consehero grandi di pais Aruba, di gobernacionnan di e pais y di lidernan politico,” asina Prome Minister Eman a describi e fayecido politico.

Cu palabranan masha bunita Eman a splica loke Mito Croes tabata nifica pa varios lider politico. “Sin e consehonan, guia y tambe e palabranan hopi bes di curashi di Mito Croes pa sostene nos, awe kisas hopi no a traha e carera politico estatal cu nan a desaroya pa nos pais.” E mandatario a hay'e ta tuma un momento di silencio na momento cu e tabata papia pa e tristesa grandi cu e fayecimento di Croes a causa. "P’ami e ta un perdida personal hopi grandi, pasobra desde prome momento cu mi a drenta politica, na 2001, te cu antayera, e contacto cu Mito Croes no tabata semanal, pero diario y tin bes cada ora. E retonan pa por duna contenido na un pais, pa por laga un isla chikito supera retonan grandi den cuadro di e mundo cu nos ta biba aden y un Reino cu a bira hopi mas cla, e cantidad di consehonan y apoyo cu mester pa por logra duna Aruba e guia pa pasa e momentonan di mas complica den nos historia, no tin un miho persona cu por a cay bek riba dje cu no tabata Mito Croes.”

E mandatario a splica cu no unicamente pa sabiduria di Croes, cu pa tur hende tabata conoci, pero pa e genio cu e tabata riba tereno di ley, riba tereno estatal, poco bes ta haya un genio, un persona cu asina conocemento, tin mes grandi cu su conocemento un curason y consenshi asina integro y humano. “Ta manera cu cada tanto tempo nos Creador ta pone riba e mundo aki un persona cu por yuda nos pasa e temponan dificil den cosnan grandi di un nacion, pais y un Reino. Mito Croes su trabou pa Aruba, nos no por caba di skirbi'e." El a agrega cu Croes a skirbi un cantidad di buki, pero pa skirbi loke el a haci pa Aruba y su contribucion na e pais, ta enciclopedianan lo mester dedica na dje.

Prome Minister Eman a papia di e forma con Mito Croes tabata para cu e generacion nobo cu a rebiba e lucha di Status Aparte di Betico Croes pa Henny Eman pa Watty Vos. Su contribucion grandi tabata ora cu Hulanda a bisa cu Aruba no por haya Status Aparte. E tabata e bos di consehero di e coriente politico cu a opta pa Independencia, pero Mito Croes a lanta para y a apoya Henny Eman, esta cu si Aruba opta pa Status Aparte, Hulanda no por forsa Aruba keda den Antiya of bira Independiente. Esaki pasobra den e sistema internacional, e derecho di e pueblo ta e bos di Dios, Eman a splica.

Expresionnan haci den e articulo aki no necesariamente ta refleha opinion di ArenaPoliti.co