Majoria hende conoce Mito Croes como jurista briyante cu tin e don di wak un dimension diferente of un oportunidad nobo den tur ley. Den tur silencio e tabata por analisa situacionnan na Aruba y den Reino. Den tur trankilidad di su oficina of cas e tabata busca y propone solucionnan structural pa problemanan. 

IDEALISMO y REALISMO 
Mito su inteligencia no tabata limita na djies conocemento di ley. Mito tabata uza su conocemento di ley y su comprondemento di comunidad, pa cambia cosnan den nos comunidad. Su idealnan tabata pa elimina tur forma di inhusticia y dependencia, sea ta entre hende of entre paisnan den Reino. Mito tabata combina den un forma excepcional y casi incomprendibel su idealnan grandi pa su pais y e realismo di sa kico mester haci y con pa realisa cambio den forma structural. E combinacion aki a haci cu Mito a bira e consehero di amigo y no amigo, pasobra e tabata por a bisa bo con pa realisa loke bo kier logra den un forma corecto y structural. Mito no tabata kere den cambionan superficial of cosmetico. Pesey e cambionan cu e mes a propone riba asina hopi tereno durante di henter su carera di casi 40 aña, tabata tin un impacto asina grandi. 

CAMBIO 
Mito tabata convenci cu pa crea un comunidad mas husto y mas igual, mester a kita dependencia y stop patronahe politico, mester a trece cambio den ley, den structura y proceduranan den gobierno y den comportacion di hende den nan funcionnan publico. Algun di e areanan cu Mito a trace cambio grandi ta den integridad den e forma di goberna, den eliminacion di patronahe politico, den crea mas oportunidad door di renoba enseñansa y door di cambia custumber y structuranan den Reino pa cada pais di Reino por funciona mas autonomo. Riba cada un di e terenonan aki Mito a laga un herencia di principio, norma, ideal, accion y documentonan yena cu ideanan pa generacionnan actual y di futuro. Ora yama Mito un "genio" esey ta un intento pa acapara tur su talento, donnan y caracter den un palabra. Esey ta dificil. Pasobra Mito tabata excepcional ariba asina hopi tereno. Pesey Aruba lo haci falta di Mito Den tanto diferente situacion.

Expresionnan haci den e articulo aki no necesariamente ta refleha opinion di ArenaPoliti.co