MITO CROES: "ELIMINA PATRONAHE POLITICO" 

"Mito Croes por a bay laga nos, pero nos no ta bay laga e herencia grandi di idealnan, norma y criterionan politico, meta y ideanan concreto di Mito bay perdi. Un di e principionan politico di Mito y di AVP tabata y lo sigui ta, e eliminacion di inhusticia, patronahe politico y diferencianan inhusto den comunidad. Den su trabou como politico Mito a percura na diferente ocasion y riba diferente tema, pa cambia ley, procedura y structura pa elimina e patronahe politico cu tabata tin. Embez di patronahe politico, Mito a sigura derechonan igual pa tur ciudadano di nos pais." Asina Rene Herde' a bisa papiando di e herencia politico di Mito Croes y di AVP. Cu tres ehempel ela ilustra den forma concreto con Mito como miembro di AVP a traha pa elimina patronahe politico. 

CUIDO MEDICO
Prome cu a crea e Seguro Medico General (AZV) tabata tin un grupo masha grandi di famia den nos comunidad cu no tabata tin niun forma di seguro pa cubri gastonan medico. Ora hendenan aki bira malo of mester haya tratamento medico den otro pais, nan mester a bay serca un politico den gobierno pa pidi e fabor pa haya cuido pa nan salud. Politiconan tabata uza e fabor aki pa haya leatad di hende cu nan a yuda y pa haya nan voto den eleccion. Pa Mito esaki tabata inacceptabel y un violacion di e derecho di cada ciudadano pa cuido di su salud. For di e prome gobierno despues di 1986, Mito tabata boga pa introduci un forma di seguro medico pa tur hende. A institui un comision pa cuminsa studia y prepara e seguro pa tur hende. Na aña 2001 esaki a keda regla.

ONDERSTAND
Pa ciudadanonan sin trabou of entrada, tabata tin e posibilidad pa haya ayudo di gobierno. Pa esaki tambe hende mester a pidi e minister e fabor pa haya e ayudo financiero aki. Mescos cu e cuido medico, pa Mito e ayudo no por tabata un fabor di un politico, pero un derecho di cualkier ciudadano den necesidad. Mito a urgi y traha pa regla cu e ayudo financiero di gobierno ("Onderstand") ta wordo regla den ley, como un derecho cu tur hende tin si nan bini na remarca pe.

BEKA PA STUDIA
Pa hopi aña prome cu Status Aparte gobierno tabata duna beka na studiantenan pa bay studia den exterior. Lamentabelmente no semper tabata duna e bekanan aki a base di e capacidad di e studiante of e necesidad di nos pais. Hopi biaha tabata duna un beka pasobra e majornan di e studiante tabata pidi un fabor politico di e gobierno. E gobierno tabata duna e beka a base di e color politico di e majornan di e studiante. Aki tambe Mito a haya cu mester a cambia e dunamento di beka como un fabor politico, den un derecho di cada studiante pa por sigui studia den exterior. Apenas algun luna como e prome minister di enseñansa di nos pais na 1986, Mito a cuminsa traha riba un ley pa kita e beka cu apenas 40 studiante tabata haya, pa duna tur studiante cu tabata desea di bay studia e derecho pa haya financiamento pa su estudio. For di 1987, pa casi 30 aña caba, tur aña 200 pa 300 studiante ta sigui studia aki na Aruba of den exterior cu financiamento di gobierno. Den palabranan di Mito, patronahe politico y fabornan politico no por remplasa e derecho di cada ciudadano. Loke Mito a haci a cambia bida di miles di hende y a hisa nos pais na e nivel di paisnan cu ta sigura tur su ciudadanonan derechonan igual enbez di haci nan dependiente di fabornan politico.

Expresionnan haci den e articulo aki no necesariamente ta refleha opinion di ArenaPoliti.co