Hopi ta esnan den pueblo di Aruba di tur color politico cu ta puntra nan mes …ta kiko a pasa realmente den parlamento  diahuebs, 8 di September 2016 ? 

Ta un hecho cu e ‘Amienda di Desiree’ a causa hopi discussion den pueblo di Aruba. Christianan di tur dominacion a expresa nan preucupacion y a demonstra  entregando nan mensahe na tanto gobierno como parlamento  encuanto nan preucupacion. Na otro banda e ciudadanonan LBTG y nan sostenedornan tambe a hiba un lucha formal  pa locual nan ta considera nan derechonan. 

Na promer lugar e ‘amienda di Desiree’ a domina un reunion di parlamento cu tabata primeramente destina pa trata 800 cambio den nos Codigo Civil.  Siete siman prome cu e reunion mester a tuma lugar sra Desiree de Souza Croes a anuncia  y a entrega su ‘amienda’ na presidente di parlamento.  Misanan Christian a considera cu e ‘amienda di Desiree’ tabata encontra  ‘Ley di Dios’ y a lucha contra di esaki den tur forma. Prome cu tratamento a inicia sra Desiree a hala bek su prome  amienda y a entrega un ‘amienda adapta’. Atrobe nos pregunta….Kiko a sosode durante e reunion di parlamento ? 

1. Durante e primera tanda di e reunion tabata visible cu masha poco miembro di Parlamento a hiba palabra ‘claramente’ varios tabatatin miedo di mishi cu e thema aki mientras tambe tabata visible cu apesar cu e  otro 800 cambio di nos Codigo Civil tabata anjas den preparacion  tabata visible cu parlamento no tabata prepara pa atende esaki !!
   
   
2. A accentua cu no ta trata ‘matrimonio pero di geregistreerd partnerschap y a accentua especialmente ‘trato igual’.
   
   
3. Tabatatin varios vez cu fraccion di AVP a pidi ‘suspension’ di e reunion pero presidente kier a continua….hasta por a experiencia un momento ‘stranjo’ unda Lider di MEP sra Evelyne Wever Croes a sostene AVP y gobierno den nan peticion pa logra suspende e reunion.
   
   

**** Esaki pa PPA  tabata e indicacion fuerte cu e ‘amienda di Desiree’ tabata causa diferencia di opinion den seno di fraccion di  MEP tambe !

Conclussion di e prome tanda pa PPA tabata ‘cu e Amienda di Desiree’ tabata manera un tractor para cla pa move sin cu ni AVP ni MEP ni Dem Real tabata sa con pa atende cunele. (Nan a tuma nan reces di staten y no a dedica atencion NI na e 800 cambio den nos Codigo Civil menos ainda na e ‘amienda di Desiree’).

CONTINUACION DI E REUNION:

Contestacion di pregunta a bai superlihe debi na e poco preguntanan. Cierto momento a bai den un suspencion di reunion pa bai come cual suspencion en vez di e UN hora anuncia a resulta den mas cu cinco(5) hora.

Ora presidente sra Marisol Lopez Tromp a habri e reunion a worde anuncia cu lo tin un ‘amienda di concencus’ cu lo worde presenta. Aki mester tene cuenta cu e descurso di sra Desiree Lopez Tromp …na un forma cla como un ganador  el a hiba palabra splicando cu fraccionan a logra un ‘concensus’ riba su ‘amienda di Desiree’. Na final presidente a corde algo….y Desiree a hala su amienda aden pa asina duna e ‘amienda di consensus riba su amienda’ un oportunidad.  Sra Presidente Marisol Lopez Tromp a presenta un ‘amienda di consensus’ e nomber ta bisa suficiente… ‘amienda di consensus’…consensus riba kiko ???? Riba  e ‘Amienda di Desiree’ !!!

Durante argumento con lo vota…  claramente e  ‘dolor’ cu e ‘Amienda di Desiree/consensus’ a causa den fraccion di AVP a bira visible. Ora dos miembro a accentua cu esaki NO tabata forma parti di e programa cu partido AVP a bai eleccion cune nan a worde contesta hopi fuerte pa sra Desiree Croes …cu esaki no ta berdad…pasobra AVP ta un partido cu ta para pa ‘igualdad’ y  e ta di un famia cu ta 75 anja AVP mester por sa y si nan NO ta di acuerdo… entrega boso retiro na AVP  numa !! Un mensahe cla y raspa dirihi e.o. na sra  Lorna Varlack, sra Clarisa Velasquez y otro.  Den fraccion di MEP nan ‘silencio’ a hala atencion..!!

Votacion riba e ‘consensus riba e amienda di Desiree’ :

E votacion a demonstra un division formal den e dos fraccion mas grandi den parlamento !!

Di AVP su 11 miembro presente solamente 6 a vota PRO y 5 miembro di AVP a vota contra..cu otro palabra solamente 5 miembro a para banda di nan lider di fraccion….pasobra nan Lider di Partido/Prome Ministro Mike Eman a sconde pa e topico aki !  Cu e votacion aki AVP como partido politico ‘Christian Democrata’ no  a sostene e  mundo Christian na Aruba !.

E votacion di fraccion di MEP a causa  sorpresa y dolor ora solamente DOS miembro a para banda di nan Lider di fraccion sra Evelyne Wever Croes  y nan tres a vota PRO.  Cuatro (4) miembro di MEP NO a para banda di nan Lider di fraccion/partido y a scoge pa bandona sala di parlamento pa NO vota pa e ‘consensus riba e amienda di Desiree’ !

KIKO MAS ESAKI TA NIFICA……MEP/DEM REAL A SCAPA AVP SU GOBIERNO DI CAI  ??

E palabranan doloroso expresa pa sra Desiree de Souza Croes direccion pa e.o. sra Lorna Varlack y sra Clarissa Velasquez  ta indica claramente e direccion cu e asunto aki lo a tuma den AVP si  NO a logra un majoria pa pasa e demanda ..esta e ‘Consensus riba Amienda di Desiree’.  AVP lo a cai den otro formalmente …y No lo por a sigui goberna. Eleccion nobo lo mester a worde jama !!

MEP y Democracia Real a scapa   gab Mike Eman(AVP) di cai !!  Un gobierno cu a hiba un ‘mal gobernacion’ un gobierno cu a crea un debe nacional enorme, un gobierno cu ta responsabel pa ‘hedging’ …responsabel pa un racha di medida…un gobierno cu tin pueblo ta sufri .. y   MEP y Democracia Real ta pone ‘zalf’ riba nan blaarnan di AVP !!  A larga pueblo cai !!! Esey ta e realidad…..Esey ta e tristo berdad… !  E storia  cu e ‘amienda di consensus lo NO ta e amienda di Desiree’ ta un storia …e ta e consensus riba Desiree su Amienda !! Y e ta e forma cu AVP y principalmente MEP y Dem Real a kere cu nan por a bende  pueblo/nan votadornan  e asunto aki.  Si a larga AVP sinta riba nan propio blaarnan interno.   E argumentacion di sra Evelyne cu tur respet PPA NO ta kere aden…… Sra Evelyne ta pidiendo pueblo kere den su argumentacion mientras  cuatro(4) miembro di su propio fraccion a rechasa nan  door di bandona sala y no vota pa e ‘concenso’  mientras cu Sra Evelyne, Sr Glenbert Croes y Sr Chris Romero  a considera asina importante… !! Pesey mes e storia di Sra Evelyne no tin credibilidad !!

PPA ta considera e capitulo aki …..Uno hopi tristo…..hopi tristo mes… !!    

PPA lo aumenta nos oposicion di pafor di parlamento…pasobra visiblemente e oposicion den parlamento a perde hopi credibilidad y ta responsabel awor pa AVP su bagamunderia/mal gobernacion.  


Aruba, 10 september 2016                                                  Lider Politico di PPA

                                                                                                 BENNY NISBET

Expresionnan haci den e articulo aki no necesariamente ta refleha opinion di ArenaPoliti.co