ORANJESTAD – Den su bon beis caracteristico, asina Minister Sevinger tabata cana combersa cu bisiñanan di Madiki Kavel y skop poco bala cu e muchanan riba e veld. E mandatario a compaña Premier Eman durante un bishita di trabou durante instalacion di verkeersplateaunan. A instala dos na cada banda di e mini-veld di futbol di yerba artificial y luga di recreacion di e bario, pa asina eleva e siguridad pa tur peaton y particularmente di e hobennan cu ta haci uzo di e facilidad. Siguridad tambe ta forma un aspecto importante den calidad di bida cu Gobierno ta trahando riba dje rond di nos isla.

Minister Sevinger a conta cu ta pa hopi aña bisiña tabata pidi un luga di recreacion pa chikito y grandi. Den vision di Gabinete Mike Eman, a bin cu e modelo Hulandes di ‘Bario Saludabel’ caminda ta percura pa varios aspecto manera, infrastructura, salubridad, recreacion y siguridad. Trahando hunto cu FCCA a realisa un mini veld di bala cu iluminacion y tambe un area cu ekipo pa ehercicio. Awo a añadi e parti di siguridad pa medio di e verkeersdrempel cu ta obliga e autonan pa baha velocidad den e area.

Minister Sevinger ta felicita e ekipo di Departamento di Obranan Publico (DOW) cu ta encarga cu esaki, bou liderazgo di Marlon Croes. E mandatario ta consciente cu e lista di peticion pa pone verkeersdrempel den bario ta core den e miles, pero e tin confianza cu ta logra yega na tur.

“Nos ta contento cu e combinacion cu Gobierno a trece for di tempo cu nos a start cu proyectonan den bario. Minister President ta pusha e proyectonan cu ta hisa e nivel di bida di nos ciudadanonan tanto den e forma di haci recreacion, di haci deporte; tanto den e parti di salubridad y e den e parti di siguridad, mescos cu riba trafico y poniendo luz, pero tambe den e parti di convivencia,” asina e titular di Infrastructura a comenta. “Nos ta contento con e ta bayendo, bisiñanan ta contento y asina poco poco nos ta mira cu nos ta trece bek den e bario e siguridad y alegria cu e ciudadanonan kier.”

Expresionnan haci den e articulo aki no necesariamente ta refleha opinion di ArenaPoliti.co