Mike Eman mes tin culpa con cos a bai. 

STA CRUZ - Den fin di siman por a nota cu prome minister di Aruba Mike Eman a manda un carta brabo pa Hulanda pa reclama e forma con e nombramento di gobernador a bai. Hulanda a contesta cu tur cos a bai segun procedura di Statuut.
Pa locual nos por a compronde ta cu Mike Eman mes a busca tur e problema aki. Na prome lugar el'a tarda demasiado pa bin cu su mesun candidatonan. E tema aki ta uno serio y e mester a trate na forma serio tambe.
Na di dos lugar, Mike Eman no a defende su candidato Angel Bermudez, manera Nel Oduber si a defende su candidato tempo el'a propone sr Freddis Refunjol.
Na di tres lugar, henter Aruba tabata sa cu sr Alfonso Boekhoudt tabata e candidato di Hulanda, bo kier pretende cu Mike Eman so no tabata sa?

Nombramento di un gobernador ta motibo pa un pueblo uni pa yama e gobernador bon bini. Nunca antes nos a haya nos confronta cu algo asina. Ta cu AVP so e cosnan aki ta pasa.

Mi ta urgi Mike Eman, stop cu busca confrontacion pa e caso aki, pasobra ta bo mes a cause. Confrontacion no ta yuda cu nada, especialmente awor cu Rey a seya e nombramento cu e decreto real. Hulanda ta insisti cu nan a cana e procedura corecto. Y ta danki na e actitud complaciente cu AVP semper a aplica pa cu Hulanda, awe nos ta den e situacion aki. Pues ta bo mesun culpa.
Mike Eman, miho stop cu e pleito infantil aki, y ban goberna nos pais. Ban hasi Aruba mas sigur. Ban caba cu abuso sexual di muchanan. Ban drecha nos cuido medico cu awor ta cabando cu nos hendenan.

Expresionnan haci den e articulo aki no necesariamente ta refleha opinion di ArenaPoliti.co