E siman aki MFA Paradera ta habri! 

ORANJESTAD – E siman aki ta uno hopi grandi pa Aruba completo, pero specialmente pa e districto di Paradera. E districto su propio Facilidad Multifuncional ta keda oficialmente inaugura e siman aki. Esaki ta nifica e inicio di un era nobo den loke ta prestacion di servicio publico. E ceremonia di apertura oficial ta tuma luga diahuebs awo 27 di october y tur hende ta bon bini. Departamentonan di gobierno y priva cu ta bay opera na MFA Paradera ta masha contento cu e luga y ta ansioso di por cuminsa comparti esaki cu e pueblo di Paradera y bicindario. Pa Prome Minister Mike Eman, esaki ta otro promesa cumpli y tambe e mehoracion di e calidad di bida di e ciudadanonan.

Despues di Noord, Paradera ta e di dos districto cu ta haya su MFA. E concepto ta uno cu Gabinete Mike Eman a desaroya den consulta cu e ciudadanonan di cada bario pa asina adapta cada MFA na e necesidad y deseonan di e barionan cu e ta bay sirbi. Den e caso di Paradera, ciudadanonan a pidi contacto cu naturalesa y salanan pa estudio cu por wordo uza pa diferente gruponan den comunidad, e.o. gruponan religioso, cultural, educacional. Ambos peticion a keda cumpli pa medio di glasnan grandi cu ta conecta e espacio paden cu esun pafo y tambe tin espacio na disposicion di ciudadanonan, pa duna les y/of tene reunion.

E diseño, construccion y awo maneho di e edificio, tur ta den e mannan capacita di nos mesun hendenan. E planificacion ta responsabilidad di arkitecto ir.Joel Croes, mientras cu BIC/Thiel Corporation a ehecuta esaki, y awo, ta otro yiu di e bario, Elton Hart ta esun apunta pa dirigi e operacion diario como Gerente General. Na e momentonan aki e.o. hulpbestuurskantoor di Paradera y Departmento di Impuesto ta e deparartamentonan cu ta ofrece nan servicionan for di MFA Paradera.

Mescos a haci cu MFA Noord, e edificio di Paradera ta bay dedica na un baluarte di e bario y esey no por ta otro cu e gran Mito Croes (dfm). Diahuebs atardi awo ta bay tuma tempo pa recorda Mito su bida y  legado, y naturalmente tambe lo celebra e dia importante aki cu musica y alegria. Tur hende ta invita pa forma parti di dje. Paradera, bin conoce bo MFA! 

Expresionnan haci den e articulo aki no necesariamente ta refleha opinion di ArenaPoliti.co