Na apertura di MFA Paradera, ‘Cas di Mito’  
MFA Paradera ta otro muestra cu Aruba sin ningun cen ni aporte di Hulanda ta cana su caminda. 

ORANJESTAD- E ambiente na Paradera, diahuebs ultimo, dia di apertura di MFA Paradera 'Cas di Mito' tabata un di union y di respet pa otro. Prome Minister Eman den forma cla a pone enfasis riba esey tambe den su discurso. El a splica e motibo di escogencia di nomber di e persona di gran taya aki, dr. Mito Croes, kende a brinda Aruba su inteligencia y sabiduria sin spera nada a cambio. Cu awe e ta wordo honra cu un edificio na su nomber ta mas cu na su luga. Mito Croes semper a para fuerte y firme ora tabata trata asuntonan di Reino unda Hulanda kier a impone su kier y tuma decisionnan cu no tabata cuadra cu loke Statuut ta para p'e. Mito semper tabatey pa confronta madre patria cu fervor, cu hechonan y cu ley den su man cu Aruba, e pais chikito, ta cana e caminda cu e mester cana y merece respet pa esey.

Eman: "Nos ta cana tur dia e caminda duro den un mundo yen di reto. Cerca di nos tin un pais cu retonan hopi grandi. Nos tabata biba den un pais cu dos pilar economico y diripiente uno ta cay afo.  Nos ta biba den un mundo caminda institutonan financiero grandi ta derumba na New York y otro partinan di mundo y nos, e isla chikito aki, ta biba cu e consecuencianan. Aruba a sa di wanta cabes riba awa." Despues Eman a bay over riba e tema cu semper e ta pone hopi accento riba dje. E hecho cu Aruba a lanta cabes  sin ningun ayudo. "Sin ningun cen, sin ningun aporte di ningun otro pais den Reino y sigur no esun mas grandi (Hulanda) nos a sa di pone e pais aki bek riba pia. Awe Paradera ta mira parti di e bienestar cu nos a crea pa e pueblo aki."

Prome Minister Eman a splica cu ora e bienestar ta wordo parti esaki ta algo hopi bon pa un pueblo. "No tin nada mas cu ta duna satisfaccion na un comunidad cu ta sinti cu e tambe ta conta, cu e ta parti di e totalidad ora cu den su bario scolnan ta wordo renoba, e camindanan den e bario ta wordo renoba, cu tin un edificio cerca unda e ciudadano por yega pa paga su awa y coriente y busca formularionan di Censo. Esaki ta e servicio di cinco strea cu e gobierno aki a priminti." Eman a recorda con duro e curason di Paradera ta palpita cu gobierno y pueblo henter ta reconoce e yiu di tera Mito Croes dedicando e edificio special aki na ne. Poniendo atencion tambe na un otro yiu di Paradera Prome Minister a menciona cu dentro di poco ta bay huramenta como gobernador interino di Aruba sra. Yvonne Lacle, kende tabata pesente. Un anuncio cu a wordo ricibi cu un awacero di aplauso.

Expresionnan haci den e articulo aki no necesariamente ta refleha opinion di ArenaPoliti.co