Alabes ta gradici sra Ella Tromp-Yarzagaray pa su añanan di sacrificio y dedicacion na representa Reino. 

E funcion di Gobernador Interino ta un funcion importante cu ta rekeri hopi sacrificio y dedicacion pa tanto e representante di Reino como su famia.
Prome di november ultimo, a tuma luga e huramentacion di Gobernador Interino nobo, sra Yvone Lacle-Dirksz.

“Den nomber di Fraccion di MEP y di henter e famia di Movimiento Electoral di Pueblo MEP, nos ta felicita y desea sra Lacle-Dirksz, su esposo Anthony Lacle y henter su famia hopi exito como Gobernador Interino di nos pais. Nos ta pidi Dios pa E ilumina sra Lacle den tur e desicionnan importante cu e mester bay tuma den e funcion aki, pa asina e por carga e funcion aki na un manera digno y cu honor. Nos ta desea sra Lacle y su famia forsa den e reto nobo pa e siguiente añanan. 

Na e mes momento nos a tuma despedida di sra Ella Tromp-Yarzagaray, nos Gobernador Interino pa e ultimo 8 añanan. Sra Tromp-Yarzagaray a haci un trabou sublime y a carga e funcion cu honor y dignidad. Pueblo di Aruba sigur ta sumamente orguyoso di sra Ella.

Como hende muher especialmente, mi ta haya e forma cu honor y dignidad cu sra Ella Tromp a ehecuta su funcion sigur ta un inspiracion pa tur hende muher aki na Aruba como tambe den exterior.

Sra Tromp-Yarzagaray tin un trayectoria largo den politica prome cu el a tuma e funcion aki. El a fungi como miembro di Parlamento, Minister y Minister Plenipotenciario.

Di curazon nos ta gradici sra Ella Tromp-Yarzagaray, su esposo Leo y su yiunan y henter famia pa tur e añanan di sacrificio y dedicacion na representa Reino na Aruba. Y ta nos deseo cu sra Tromp-Yarzagaray por goza awo di un pensioen bon mereci”, ta palabranan di sra Evelyn Wever-Croes.

Expresionnan haci den e articulo aki no necesariamente ta refleha opinion di ArenaPoliti.co