Dialuna mainta 7 di november Parlamento a tene un ceremonia solemne na unda Gobernador Interino sra Yvonne Lacle-Dirksz a presenta su mes na Parlamento y Pueblo di Aruba. Esaki a socede den precencia di Gobierno, Parlamentarionan y invitadonan.

Nos Gobernador Interino despues di a saluda tur esnan presente, a tene su discurso cu hopi emocion, na unda primeramente el a gradici su Mahestad, Rey Willem Alexander kende a nombr’e como Gobernador Interino di Aruba.

Sra. Yvonne a priminti pa sirbi pais Aruba lo miho cu e por den su funcion como representante di Reino y tambe como Hefe di Estado di pais Aruba. Den su discurso ela haci un apelacion pa un refleccion riba e 30 aña di nos Status Aparte y pa cada ken pensa riba kiko tabata su aporte na esaki.  El a termina su discurso gradiciendo Dios y pidi Su bendicion y guia pa nos tur den Reino.

Un biaha mas, Fraccion di MEP ta yama bon bini na nos Gobernador Interino sra Yvonne Lacle-Dirksz y ta dese’e exito den su funcion como representate di nos Rey na Aruba. 

Expresionnan haci den e articulo aki no necesariamente ta refleha opinion di ArenaPoliti.co