Gobierno ta felicita WEB pa su vision. 
San Nicolas ta carga e maneho sostenibel di Gobierno y pais Aruba. 

ORANJESTAD – Diabierna den oranan di atardi den presencia di stakeholdernan a keda inaugura e “parke solar” riba dak di Abraham de Veer School. A toca honor na Prome Minister Eman, Minister Mike de Meza y sra. Jane Bueno-Hooft, directora di Commandant Generaal Abraham de Veerschool, pa cende e switch pa e panelnan solar oficialmente bay den uzo.

Inauguracion di e parke aki ta un orguyo pa Gobierno, principalmente pa Prome Minister Mike Eman y Minister de Meza, ya cu e 750 panelnan instala ta haci di Abraham de Veer School e di dos mas grandi despues di e parke solar na aeropuerto. E panelnan na Abraham de Veerschool ta produci diariamente 976 kWh cu ta ekivalente na coriente pa 60 cas a base diario.

Specialmente pa Minister Mike de Meza inauguracion di e proyecto ta yen’e di orguyo pasobra su anterior scol no solamente a caba di haya un renobacion pero ta e di dos scol na Aruba, despues di Kudawecha cu tin panelnan solar. Ademas el a anuncia cu pronto lo cuminsa cu un parke solar na Lago Heights / Esso Heights y cual na final lo bira e parke solar mas grandi di Aruba. E dosnan aki hunto cu e molinanan di biento ta loke ta cargando e maneho sostenibel di Gobierno di Aruba.

Inauguracion di e proyecto aki ta haci cu Aruba ta dal otro paso pa yega mas cerca di e meta pa ta draai riba energia sostenibel na 2020, Prome Minister Mike Eman a bisa e atardi aki. Proyectonan manera esaki ta demostra cu Aruba tin “the skill and the will to make it happen”, manera cu ehecutivonan di Carbon War Room y Rocky Mountain Institute a expresa ora di a cera un partnership cu Aruba. No solamente ta papia, pero ta ehecuta e pensamento pa yega na e meta di sostenibilidad. “Ora riba plataforma mundial bo ta wordo etala como ehempel, e ta dunabo un responsabilidad pasobra nos no mag di faya cu nos pais, ni cu esnan cu a confia den nos pa ta e ehempel pa mundo,” Prome Minister Eman a expresa. Pesey ora cu mira ehecucion di e proyecto, nos ta orguyoso di e trabou”.

Abraham de Veer School ta un scol cu ta cuminsa funciona for di 5’or di mainta te cu 10’or di anochi, mirando cu no solamente ta atende studiantenan cu ta yega scol mainta, pero tambe ta ricibi studiantenan di Middag MAVO y Avond MAVO.

Instalacion di un parke solar na Abraham de Veer School ta un proyecto cu a wordo realisa door di WEB Aruba NV den cooperacion cu companianan manera TNO, Utilities Aruba, ELMAR y otro partnernan strategico di Gabinete Mike Eman.

Expresionnan haci den e articulo aki no necesariamente ta refleha opinion di ArenaPoliti.co