Minister Bermudez: “Presupuesto supletorio 2016 y presupuesto 2017 ta di caracter realistico”
ORANJESTAD - Manera ta conoci caba e aña aki Minister di Finanzas, Angel Bermudez a entrega presupuesto 2017 prome cu 1 di September manera e ley di contabilidad ta stipula. Mientras tanto e mandatario a confirma cu ya caba e la ricibi e preguntanan di parti di e fraccionnan. “Nos ta spera en total entre 700 pa 800 pregunta cu nos lo contesta por escrito tambe y tur esten nos ta keda den espera pa Parlamento stipula un fecha pa su tratamento publico”, e mandatario indica.
Na mes momento, e concepto di e presupuesto supletorio di 2016 tambe ta den pleno desaroyo, unda cu desde siman pasa caba e mandatario di finanzas a entrega esaki na e colegio di CAft. Segun Minister Bermudez asina cu e ricibi e consehonan di e colegio, nan lo haci un revision di e presupuesto supletorio basa riba e consehonan aki y despues mand’e pa Raad van Advies formalmente.
E mandatario ta splica cu despues di a entrega e presupuesto 2017 na parlamento a bolbe tira un bista riba e presupuesto di e aña aki y naturalmente ainda tabata tin algun desaroyo tumando luga manera e negociacionnan cu Valero y firmamento cu CITGO. “Esaki ta haci cu nos mester ahusta y adapta e presupuesto actual prome cu aña caba, pa e cubri e realidad di e aña aki y esey mes nos ta trahando riba dje actualmente”, asina Minister Bermudez a informa.
Segun splicacion di e mandatario, ademas tin diferente sumanan cu ta ‘budget neutral’ cu mester wordo re-aloca, pues nan ta wordo kita di un ‘post’ di e presupuesto pa un otro ‘post’ segun cambio di perspectiva di e Ministernan concerni.
Pa loke ta trata e consehonan y opinion di CAft, cu na varios ocasion a manifesta cu Gobierno ta mucho optimista, Minister Bermudez a manifesta cu no solamente bo mester ta optimista pa e trabounan aki pero cu na 2015 mes a demostra cu e resultadonan tabata realistico tambe. “Na e momento nan aki nos ta cabando e relato pa e cuenta anual di 2015 y eyden nos a mira tur e esfuersonan cu a wordo haci pa 2015 y cu e resultadonan tabata positivo, mescos nos lo sigui pa 2016”, asina e mandatario a duna di conoce.
Ademas, e mandatario a sigui bisa cu e presupuesto supletorio 2016 y e presupuesto 2017 ta realistico. “Nos a bolbe haci calculacionnan y nos ta para riba nos punto di bista cu e presupuesto pa un gran parti tin un balor realistico. E aña aki tambe nos lo logra realisa e standard cu ta e 2% di deficit di e producto bruto nacional di Aruba, pues tanto aña pasa como e aña aki nos lo sa di realisa e deficit segun e ley di LAft”, asina Minister Bermudez a confirma.
Minister Bermudez a confirma cu ainda no a haya confirmacion riba ki dia posiblemente e reunion publico pa tratamento di presupuesto 2017 lo tuma luga, sin embargo su expectativa ta cu pa e di dos of di tres siman di luna di November esaki lo mester tuma luga pasa asina esaki keda cla pa prome siman di December. Na mes momento tambe e presupuesto supletorio 2016 pronto lo cuminsa su trayecto constitucional pa asina e wordo trata den parlamento prome cu fin di aña.
Expresionnan haci den e articulo aki no necesariamente ta refleha opinion di ArenaPoliti.co