Awe dialuna 19 di december Parlamento di Aruba ta trata un combinacion di leynan. Esakinan ta entre otro e Cuenta Anual 2015 di Gobierno di Aruba y e Presupuesto Supletorio 2016 di Gobierno di Aruba. E Presupuesto 2017 ya a wordo trata algun siman pasa den casi dos siman di reunion cu cada minister. Esaki ta nifica cu pa prome biaha desde cu Aruba a bira un pais autonomo den Reino na 1986, ta trata e Cuenta Anual di e aña anterior (2015), e Presupuesto Supletorio di e aña actual (2016) y e Presupuesto di e aña cu ta sigui (2017), den e aña cu segun Constitucion y leynan financiero, nan mester wordo trata. Esaki ta un otro indicacion cla di e adelanto den administracion financiero di nos pais desde 2009 ora Gabinete Mike Eman di AVP a drenta gobierno. Desde e tempo ey hopi cos a cambia pa miho. Tambe finansa publico!

MEHORACION FINANSA PUBLICO 
Na 2009, despues di a goberna nos pais pa ocho aña largo y sin un crisis of desaster natural, MEP a bay laga nos pais den decadencia. Raportnan financiero na multiple ocasion a describi esey den detaye. Tur area di nos pais y tur aspecto di nos bida a wordo afecta negativamente door di gobernacion di MEP. Pais y pueblo a wordo lubida. Ta ora cu gobierno di MEP tabata tin mester di mas placa pa gasta nan tabata corda con pa coba den cartera di Pueblo. E sin fin di medida tabata preuba di esaki. Un di e terenonan di gobernacion cu a keda den desaster bou di MEP tabata finansa publico. Gobiernonan di MEP a haya mas placa cu nunca y a gasta tur! Pueblo mes no a ripara ni wak unda nan placa a bay. E fondonan di pensioen cu gobierno mester a cuida, tabata casi bancarota. E mas cu 20 mil pensionado lo a keda sin entrada. Awe 7 aña y mey despues, finansa publico ta bek na ordo y nos pais a progresa mas cu nunca. Anto esey a sosode meymey di e crisis mundial mas servero di ultimo siglo y sin e refineria. Pasobra MEP a laga e refineria wordo sera prome cu nan a baha fe'i gobierno.

2017 
Tur hende cu a biba na Aruba of cu a sigui gobernacion di nos pais entre 2009 y 2016 a wak con den bon y den mal tempo, bou contratiempo politico pero cu hopi trabou duro, a soluciona casi tur e problemanan cu MEP a bay laga nos pais y Pueblo cun'e. Finansa Publico ta djis un di e problemanan grandi cu ta hopi miho para awe. Banda di tur loke Pueblo mes ta wak cu a cambia pa miho den nos pais y cu a cambia pa miho den nan bida, e situacion di finansa publico, ta djis un otro ehempel di e desaroyo grandi cu Aruba a conoce desde 2009. Pa prome biaha finansa publico ta bay conoce presupuestonan balansa sistematicamente (=no djis un aña si e cinco despues no!). E fondonan di pensioen cu tabata casi bay bancarota, awe ta solido atrobe y ta sigura tur pensionado nan pensioen pa futuro! E normanan financiero cu a acorda den Reino pa sigura finansa balansa ta central den e maneho y Aruba ta cumpli cu esakinan miho cu cualkier otro pais den Reino! Tur esaki ta haci cu aña 2017 (y e añanan despues) ta priminti di bira bon añanan pa nos pais y pa Pueblo!

Expresionnan haci den e articulo aki no necesariamente ta refleha opinion di ArenaPoliti.co