E caminda pa sostenibilidad; cu bista riba futuro. 
Oranjestad – 8 november 2016 

Algemene Rekenkamer a publica su rapport encuanto investigacion di e cuenta anual di Pais pa aña 2015. Den e rapport aki Algemene Rekenkamer ta indica cu tin mehoracion den resultadonan financiero pa aña 2015, pero cu e mehoracion aki no ta a consecuencia di un maneho structural di controla gastonan pa yega na sostenibilidad. Algemene Rekenkamer ta keda preocupa pa e situacion financiero di Pais. E preocupacion aki ta basa riba tres elemento cardinal di e investigacion aki, cu ta e debe di Pais, e gastonan di interes liga na e debe aki y e gastonan di personal trahando pa Pais. Algemene Rekenkamer ta conclui cu tin un caminda largo ainda pa bay prome cu por yega na sostenibilidad di finansas publico.

Sostenibilidad di finansas publico
Pa aña 2015 e Pais mester a cumpli cu e norma di deficit prescribi pa ley di 3,7% PNB. For di e investigacion haci pa Algemene Rekenkamer por conclui cu gobierno a logra cumpli comodamente cu e norma di deficit di 3.7% PNB, pa loke ta trata e cifranan estrictamente di Pais so, es decir esaki no ta encera e sector publico den su totalidad. For di e investigacion por conclui tambe cu e mehoracion nan, cu a conduci na e logro aki, no tabata debi na reduccion di gasto di forma structural. E gastonan di personal trahando pa Pais, cual ta e gastonan di mas halto di Pais, ta demostra un rebaho minimal y e gastonan di interes riba fiansa ta sigui subi. Ta di suma importancia pa gobierno regla su prioridadnan di tal forma, cu por logra dominio real di gastonan riba termino largo. Mester tene cuenta cu costonan cu lo presenta den e añanan venidero pa Pais, a consecuencia di contractonan cu Pais a mara su mes na dje pa un termino largo. Pais Aruba tin cu sigui traha riba sostenibilidad di finansas publico, cu bista riba futuro.

Derecho presupuestario di Parlamento
E investigacion ta demostra cu e gastonan ta bolbe surpasa e presupuesto cu a wordo aproba door di Parlamento y cu no a cumpli cu stipulacionnan di ley di comptabilidad ora di ehecucion di presupuesto. Algemene Rekenkamer ta ripiti su preocupacion riba e hecho cu e derecho presupuestario di Parlamento ta wordo afecta den forma negativo y ta remarca cu Parlamento tambe tin un responsabilidad pa percura cu gobierno cumpli cu e proceduranan mara na e derecho presupuestario.

Recomendacionnan Algemene Rekenkamer
Algemene Rekenkamer ta recomenda e ministernan pa no perde e caminda pa yega na sostenibilidad di finansas publico for di bista, na momento di haci escogencia di maneho, y pa cumpli cu stipulacionnan di ley ora di ehecucion di presupuesto. Ta importante pa minister di Finansas y Organisacion Publico en especial, keda alerto riba e cumplimento di ley door di tur minister concerni. Pa loke ta trata personal, Algemene Rekenkamer ta recomenda pa traha riba un plan di formacion pa e oficinanan di ministernan tambe.

Na Parlamento ta wordo recomenda pa paga bon tino riba escogencianan y prioridadnan presenta pa gobierno, cu bista riba sostenibilidad di finansas publico. Ta importante pa Parlamento vigila su derecho presupuestario. Tambe ta importante pa Parlamento keda envolvi den trayectonan di mehoracion cu a inicia caba y pa sigui e progreso den e mehoracion di maneho financiero di cerca. E diferente instrumentonan disponibel, entre otro e rapportnan pa kwartaal, por wordo usa door di tanto ministernan como Parlamento pa monitor e ehecucion di presupuesto.

Reaccion di minister di Finansas
Minister di Finansas a duna un reaccion extenso riba e rapport di Algemene Rekenkamer den cual e ta indica cu metanan pa cu sostenibilidad di finansas publico a wordo alcansa pa aña 2015, por medio di medidanan structural y un maneho di gasto estricto. Algemene Rekenkamer ta aprecia e reaccion di minister pero ta para tras di e conclusionnan den su rapport. E ta amplia riba nan den e rapport unda cu esaki ta necesario.

[Klik aki pa download e version digital di e rapport di Algemene Rekenkamer.] 
E version digital di e rapport di Algemene Rekenkamer [tambe] ta obtenibel via www.rekenkamer.aw

Expresionnan haci den e articulo aki no necesariamente ta refleha opinion di ArenaPoliti.co