ORANJESTAD - Minister di Finanzas, Angel Bermudez a informa cu recientemente e la ricibi e consehonan di Raad van Advies y desde siman pasa caba varios reunion a tuma luga cu demas Ministernan y nan ‘begrotingscoordinator’ pa asina repasa e parti cu ta toca na cada ministerio y asina nan por contesta e preguntanan y duna un splicacion debido respecto e maneho manera cu e la wordo inclui den e presupuesto .

Segun a splicacion di e mandatario, e situacion actual no ta conta cu ningun aumento di belasting den e programa. “Nos tin un maneho stipula y e maneho ey ta traduci den e asina yama ‘meerjarenplan’ cu a wordo entrega aña pasa riba recomendacion di e propio Cft”, asina Minister Bermudez a indica. 

E mesun plan aki cu a wordo entrega na Parlamento como tambe na Hulanda ta encera cu pa aña 2017/2018 no lo tin un deficit mas den e presupuesto y cu esaki lo bolter te hasta na un ‘surplus’. Segun Minister Bermudez, tanto Cft como IMF cu recientemente tabata di bishita na Aruba a comenta y conclui cu e ruta riba su mes pa yega na e cero deficit ta bon, sin embargo tur dos institucion kier mira un aceleracion den e velocidad pa yega na e presupuesto balansa aki pa 2017/2018.

Manera e dignatario di finanzas a remarca na varios ocasion, tin algun aspecto cu mester tene na cuenta cun’e, por ehempel, e debe total di 2.2 biyon florin di cobransanan cu tin riba caya corespondiente na Departamento di Impuesto. Di otro banda tambe a actualisa e sistema di procesa ‘aangifte’ pues awendia tin aproximadamente un 100 mil ‘aangifte’ den cashi cu no a wordo procesa ainda.

“Na e momento cu e sistema aki ta cla cu nos logra procesa tur ‘aangifte’ mi debe ta bira mas grandi, dus na luga di introduci cualkier impuesto nobo, mi ta prevalece pa cobra lo cual tin cu cobra pa baha e debe grandi aki cu ta birando dia pa dia mas bieu”, e mandatario a splica.

Minister Bermudez ta consciente di e preocupacionnan di e diferente gremionan specialmente pa loke ta trata aumento y cobransa di impuesto, sin embargo e mandatario di remarca cu henter e maneho aki ta un acto di balans. “Shonnan con cu bo haci’e; si bo implementa un impuesto nobo of bo cobra impuesto den un solo ‘shot’, e lo tin su efecto riba nos economia y probabilidad ta cu e lo por tranca nos economia tambe”, e dignatario a expresa.

Finalmente Minister Bermudez a bisa cu si tur cos sigui cana conforme su planificacion e presupuesto lo por wordo trata prome cu final di maart na Staten. “Mi ta spera cu pa fin di e siman aki nos yega na un concepto total caminda cu nos lo purba di adapta mas tanto posibel y inclui e contestanan di e preguntanan di Raad van Advies pa despues nos manda e presupuesto pa parlamento.”

Expresionnan haci den e articulo aki no necesariamente ta refleha opinion di ArenaPoliti.co