Durante e reunion di dia 13 di October, 2016, e Comite di Maneho Monetario (CMM) di Banco Central di Aruba (BCA) a dicidi pa mantene e porcentahe actual di e tasa di e “reserve requirement” na 11 porciento y e “advance rate” na 1 porciento, despues di a evalua e datonan economico y monetario mas recien. A considera e siguiente informacion y analisis den e proceso pa yega na e decisionnan. 

Reservanan internacional 
E reservanan internacional di divisa (incluyendo diferencianan den revaluacion di oro y di reservanan internacional) y e reservanan oficial a mantene nivelnan adecua na fin di Augustus 2016. Ambos a registra aumentonan di, respectivamente, Afl. 413,7 miyon (+25,7 porciento) y Afl. 279,6 miyon (+18,9 porciento), compara cu December 2015. Consecuentemente, e reservanan internacional a yega Afl. 2.024,6 miyon na fin di Augustus 2016.

Desaroyonan den credito 
E total di credito di e banconan comercial a mustra un bahada leve (-0,1 porciento) na final di Augustus 2016 compara cu December 2015. Credito na empresa y na consumidor a baha cu 0,9 porciento y 3,7 porciento, respectivamente, mientras cu fiansa pa construccion di cas a aumenta cu 3,6 porciento.  

Inflacion
Na Augustus 2016, a registra deflacion den ambos e tasa di inflacion (-1,4 porciento) y e promedio anual di inflacion (-0,9 porciento). E caida den inflacion ta particularmente causa pa un bahada den e tarifa di coriente na Januari 2016 y pa varios caida den e prijs di gasolin cu a cuminsa na e comienso di 2015. E promedio di inflacion ora exclui e componentenan di cuminda y energia a subi na 0,6 porciento, primordialmente reflehando un aumento den e componente di vivienda di e CPI.

Turismo
Durante e prome ocho lunanan di 2016, indicadornan di turismo a manifesta señalnan mixto, como cu a registra un subida den e cantidad di turistanan crucero (+16,0 porciento), mientras cu a nota caidanan den e cantidad di anochinan permaneci na Aruba (-0,1 porciento), ingresonan turistico registra na banconan comercial (-2,8 porciento) y e cantidad di bishitantenan (-2,2 porciento), compara cu e periodo corespondiente na 2015.

Placa den circulacion
Na Augustus 2016, e cantidad di placa den circulacion a subi cu Afl. 17,9 miyon te na Afl. 4.175,0 miyon, compara cu e luna anterior. Esaki a resulta for di un crecemento den e activo domestico neto (+Afl. 18,0 miyon), mientras cu e reserva di divisa neto (-Afl. 0,1 miyon) a keda practicamente mescos. E subida den e activo domestico neto a surgi door di un aumento den tanto credito domestico (+Afl. 52,4 miyon) como transaccionnan no relata na credito (+Afl. 34,4 miyon).

Sector externo (excluyendo cuentanan bancario na exterior)
Na Augustus 2016, e surplus riba e cuenta coriente (+Afl. 9,6 miyon) a wordo completamente mitiga pa e deficit den e cuentanan di capital y financiero (-Afl. 9,6 miyon). E ultimo a resulta di bahadanan neto den e componentenan di otro inversion (-Afl. 10,0 miyon) y instrumentonan financiero di e cuenta financiero.

Sector gubernamental
Na Augustus 2016, entrada di gobierno a baha cu Afl. 1,1 miyon te na Afl. 77,7 miyon, compara cu e mesun luna di e aña anterior. E ultimo ta debi na un caida den entrada no relata na impuesto di Afl. 4,0 miyon, cual a wordo parcialmente mitiga pa un subida di Afl. 2,9 miyon den entrada di impuesto. Mientras cu a registra aumento den entrada for di impuesto riba importacion (+Afl. 1,2 miyon) y impuesto riba ganashi (+Afl. 1,0 miyon), a nota un caida den entrada for di impuesto riba benta di negoshi (B.B.O) (-Afl. 0,5 miyon).

Mercado financiero
Na Augustus 2016, e promedio di interes riba depositonan nobo a aumenta cu 0,3 punto di porcentahe na 1,6 porciento, mientras cu e promedio di interes riba prestamo nobo a mengua cu 0,2 punto di porcentahe na 7,6 porciento, compara cu e luna anterior. Consecuentemente, e margen di e tasa di interes a baha cu 0,6 punto di porcentahe te na 5,9 porciento.

Advance rate
E determinantenan di e “advance rate” di BCA a keda stabil. E margen entre e “advance rate” di BCA y e “Federal Funds rate” tabata 0,60 punto di porcentahe na Juli 2016. Consecuentemente, no tabata tin razon pa cambia e “advance rate” di BCA. 

Banco Central di Aruba
2 di November 2016

Expresionnan haci den e articulo aki no necesariamente ta refleha opinion di ArenaPoliti.co