Ta obvio cu nos pais a wordo destrui pa un gobierno cu a usa e poder di pueblo pa haci y deshaci. Esaki tawata palabranan di ex minister Otmar Oduber na momento cu e la entrega su retiro. Otmar Oduber tawata e siguente miembro di AVP cu mester a entrega su retiro pa motibo cu e no ta di acuerdo mas cu AVP aunke e mes a forma parti di desaster aki pa e ultimo 7 anjanan aki. Un promer minister cu NO tin ningun control mas riba su gobierno y mucho menos riba maneho di nos pais. Den apenas 2 anja di tempo Juan David Yrausquin a entrega su retiro, Marisol Lopez Tromp a entrega su retiro, Alfonso Boekhoudt a wordo kita for di trabou y awor a toca turno na Otmar Oduber. Mike Eman ta carece liderazgo y ta hopi debil. E no tawata tin e capacidad pa wanta un gobierno hunto. E no tawata por a syncroniza un maneho dirigi riba progreso di nos pais. Nos tin cu puntra nos mes si un persona NO por wanta ni su propio hendenan y gobierno hunto ta con e kier bai serca pueblo pa bolbe pidi pueblo mandato. E mester tin berguenza y no solamente Otmar Oduber mester a entrega su retiro sino henter e gobierno aki. E gobierno aki a destrui nos pais, nos pais NO a progresa e ultimo anjanan aki, nos pais ta den pleno deterorio y sin un lider para den su sapato. Nos pais no merece un lider cu ta somete su mes na un welga di hamber envez di atende cu e problemanan. Nos pais no mester un promer minister cu ta entrega nos autonomia y no tin ningun control riba maneho di nos pais. Nos pais no merece un promer minister cu ta aproba tur e corrupcionan cu tin den e gobierno aki. Famianan ta haya 90.000 M2 pa bende, pa haci negoshi cu nan y ta bira miyonario riba custia di pueblo y tur esaki cu aporbacion di promer minister. Parlamentarionan ta bende y horta tereno di pueblo y promer minister keto. Permisonan ta wordo bendi diaramente y promer minister NO TA ACTUA. Esaki ta e tristo realidad di nos pais y pesey nos pais ta den un decadencia. Nos tin un promer minister cu NO kier actua y no kier pa nos pais progresa. E kier e progreso pa un grupo di hende rond di dje lubidando riba e pueblo mes.

No pais ta den pleno crisis y e promer minister ta ausente. Imaginabo un pais caminda nos ensejanza ta wordo poni na ultimo lugar. Pius X school na Dakota e muchanan mester a haya les pafor bao di palo pasobra no tin airco y e fan nan ta danja y gobierno no tin plaka pa drecha nan. E situacion aki ta inacceptabel pasobra no por ta asina cu 700 miyon florin disponibel pa green corridor y watty vos boul. Anton e muchanan aki cu ta nos futuro di manjan mester haya les den circumstancianan aki. Nos pais ta parce derde wereld land.

Simplemtente bo no ta reconoce bp pais mas. No solamente tin un crisis financiero, economico, social y laboral sino tin chaos tur caminda. Si den gobierno mes e situacion ta manera cu e ta ta con e lo ta pafor. E mensahe cu nos kier manda pa pueblo ta, AVP mester bai y NO MAG BOLBE! Un gobernacion asina malo nunca mas mag di ripiti!

Expresionnan haci den e articulo aki no necesariamente ta refleha opinion di ArenaPoliti.co