Ta obvio cu e crisis den gobierno y e crisis den paertido AVP lo tin consequencia pa resultado di eleccion. Otro anja pais Aruba lo conoce un gobierno nobo y partido AVP lo NO bolbe. Nan no por a sera 2 termino di gobernacion drechi cu nan a corre cu mayoria integrantenan di partido. Un pais cu a wordo goberna pa un partido cu a usa e poder cu pueblo a duna nan pa haci y deshaci manera Otmar Oduber a bisa. Un pais cu a wordo goberna pa un partido cu e anganja nos hendenan, a manipula nos hendenan y awor cu tin kiebro un ta tira culpa riba e otro lubidando cu pa 7 anja tur a sinta hunto y destrui e pais aki. E decadencia y e deterorio di nos pais pais ta nan tur hunto ta culpable di esaki. Awor tin kier laba man y hunga Poncio Pilatus pero tur ta complice di e desaster aki.

Tur hende sa cu e gobierno aki a mata Caya Betico Croes, na e momentonan aki tin 42 tienda sera den Caya. Tin 3 factor cu a contribui na esaki. E proyecto di renobacion cu mester a dura 1 anja a dura 5 anja. E tram NUNCA mester a bin y NUNCA a duna resultado y finalmente Aruparking a caba di destrui esnan cu a keda. Awor cu Otmar Oduber a entrega su retiro ata Mike Eman kier flexibilisa Aruparking. Unda e la keda tur e anjanan aki ora tiendanan tawata sera nan portanan. E la prefera di keda keto y accepta tur cos basta su gobierno no kibra, basta tur hende keda hunto pa haci y deshaci. Awor e kier actua. Si ta actua e kier actua e ora mester actua awor contra su minister di infrastructura cu a hiba un maneho di bende Aruba completo cu amigonan y famianan. Tin hendenan a haya 90.000 M2 y te dia di awe mi no a scucha promer minister desaproba esakinan. Tin bendemento di permiso tur dia den e gobierno aki y e refree ta keto keto. Nos mester enfatisa cu nos pais NO mester un refree pa gobernan nos pais sino nos mester un hende cu ta para firme y ta para corrupcionan y ta para mal gobernacion. Ta obvio cu Mike Eman NO por a controla su hendenan y si e no tawata capaz pa controla su hendenan con e por controla e maneho di nos pais. Nos pais ta out of control den tur sentido di palabra y e referee manera Mike Eman a yama su mes ta e culpable. E no tawata tin e curashi pa poara decisionan cu ta perhudica nos pais. Aruparking a perhudica Caya y a percura pa hopi hende perde trabou. Mike Eman a scohe pa keda keto tur e temponan aki y a opta pa mantene su gobierno envez di traha pa biniestar general. Si berdad e kier trece cambio ta henter e gobierno aki mester bai cas. Ensejanza ta un desaster caminda den 7 anja no por a construe un scol y awendia muchanan ta haya les bao palo den calor. Cuido medica ta mas malo cu nunca. E anja aki ta anja record di criminalidad cu 56 atraco. Turismo a wordo laga na werki cainda Aruba a cai ten a di 16 lugar den calidad como producto. E anja aki tur cifra di turismo ta den corra. A yega e momento pa nos reconstrui nos pais bek. Un cos ta sigur, despues di tur e tempestad aki nos mester bisa, BASTA cU AVP! 

Expresionnan haci den e articulo aki no necesariamente ta refleha opinion di ArenaPoliti.co