Admiti: Mesora despues di retiro di Ministro Otmar Oduber, Mike a admiti su mal maneho pa Caya Betico Croes. Ta bay flexibilisa orario di pago di Aruparking. Esaki despues cu no 1, ni 2 pero un tristo realidad di 42 negoshi a cera nan portanan.

Turismo: E pilar mas importante di Aruba su economia, nos entrada principal como Pais, cu ta Turismo, ta na werki. Nos ta den un low-season consistente. Hotelnan ta bashi, casinonan ta bashi, restaurantnan ta bashi, taxinan ta bashi, tiendanan ta bashi y esey kiermen cu economia ta tranca y no tin entrada y pueblo ta bashi.

Criminalidad: Bienestar di nos hendenan ta prioridad nr. 1. Tur dia y mi kiermen tur dia tin crimen ta tuma lugar riba Aruba, contra su hendenan of contra turistanan. Auto ta wordo horta, telefon ta wordo horta, placa ta wordo horta, tienda ta wordo atraca, turista ta wordo atraca, comerciante ta wordo atraca y hende ta wordo atraca. Arma ta circula mescos cu biento riba nos Pais, droga ta mescos cu santo di ‘Sahara’ y ilegalnan ta drenta sin problema.

Salud: Mescos cu Bienestar, Salud di nos hendenan tambe ta prioridad number uno. E kehonan ta fuerte y hopi. Ambulance no ta suficiente pa nos comunidad creciente. Ta sumamente dificil pa traha un cita cu dokter di cas. Ta tarda masha hopi mes pa haya un cita cu specialista. Hende hopi malo cu dolor ta wordo manda cas y lamentablemente y tristo, ta fayece na cas of den parkinglot na hospital. A.Z.V. como seguro ta domina decision medico demasiado. A tuma medida di BAZV y toch tin problema financiero. No tin solucion pa dump na Prikibos y e vecindario ta sufri.

Finanza: Loke tin henter Aruba tranca ta e mal maneho financiero. A core cu JDY pa pone vakminister. A bay welga di hamber y scupi riba Gobernador pa entrega autonomia financiero. A ‘yuk’ nos debe nacional te na 6 biyon florin. A ricibi casi 1 biyon florin na fin di 2009 for di Gobierno di M.E.P. (wak e tabel) y a malgasta esaki. A tuma medida innecesario contra pueblo, manera: hisa edad di pensioen te na 65 aña, hisa prima di A.O.V., hisa tarifa di coriente cu 15%, hedge prijs di petroleo, hisa prima di B.B.O., hisa prima di A.Z.V., hisa schoolgeld y aircogeld y privilegia un persona cu 90 mil M2 di tereno.

Conclusion: A base di Mike su accion, flexibilisa orario di Aruparking, nos por conclui cu momento cu un ministro no tey mas, por tuma decision faborabel pa pueblo. Pues ministro di husticia, ministro di salubridad publico, ministro di finanza, ministro di enseñansa, ministro di energia mester bay. A base di loke Mike a bisa, esta cu e no por convence su ministro, nos por conclui cu e mester entrega retiro di su Gabinete. Asina pueblo ta libera di e mal maneho di Mike y AVP.

M.E.P.: M.E.P. lo trece alivio pa e pueblo. Entre otro, M.E.P. ta kita ‘hedging’ pa prijs di awa y coriente y gasolin por baha, M.E.P. ta baha edad di pensioen di 65 pa 62 aña, M.E.P. ta percura pa pensioen di biehes (A.O.V.) no wordo conta riba otro entrada pa perhudica pensionado y M.E.P. ta elimina schoolgeld y aircogeld.

Expresionnan haci den e articulo aki no necesariamente ta refleha opinion di ArenaPoliti.co