Elton Lioe-A-Tjam (ABO): Core cu e politico tradicional, enbes di sigui acepta mas pinda
Awor cu e baca a muri, 11 luna prome eleccion y despues cu e campaña pa asesina e caracter di un fiel ex-miembro di 27 aña cu a mara su curpa na cadena a cuminsa, e ‘gran lider’ kier bin tira mas pinda pa pueblo manera ‘yo no fui’. Diripiente despues di 7 aña, e ‘gran lider’ tin oido pa e gritonan mortal di e comerciantenan di caya grandi. Gobierno mes a mata comercio den caya grandi cu su proyecto ‘Tram’, cu no tabata presupuesta y cu te awe ainda no a termina. Y si esaki no tabata suficiente, tur 9 minister a vota ‘VOOR’ pa introduci e proyecto ‘Parkeermeter y Wielklem’ cu a mata loke a resta di e negoshinan den caya grandi.
Ni cuanto e comerciantenan tabata grita cu caya grandi tabata muriendo of cuanto negoshi a cera su porta a consecuencia di e proyectonan destructivo aki, gobierno a keda terco y sordo mudo. No tabata importa gobierno ni un bledo cuanto tata y mama di famia a perde nan trabou of cu e tabata creando un otro ‘Ghost Town’. Gobierno tabatin solamente wowo pa su interes politico y esun di cierto hende rond di dje, cu bira contratista, ‘groot grondbezitter’ y miyonario.
Como parti di su plan pa sigui asesina e caracter di su ex-colega y miembro di 27 aña di partido pero cu e meta pa aparenta como e ‘good guy’, e ‘gran lider’ awor diripiente a cambia e maneho di ‘Parkeermeter y Wielklem’, a habri caya grandi atrobe pa auto y ta ofrece gratis WiFi. Pues despues cu e ‘gran lider’ y full su kabinet a mata y a destrui e comercio den centro di ciudad, awor e kier bin tira pinda pa pueblo, pa asina lubida kendenan ta e asesinonan di caya grandi. E mesun tactica bieu y disco raya di e ‘gran lider’. Nada nobo y semper tur otro minister ta malo y culpabel menos e, siendo e lider di kabinet.
Cu e zet politico barata aki, e ‘gran lider’ ta admiti awor despues di 7 aña cu e destruccion di caya grandi tabata fout y intencional. Alabes e ta confirma cu esaki no tabata bon gobernacion, pero puramente un malgastamento di placa riba ‘pret’ proyectonan di embeyecemento y ‘Green’ pa manipula pueblo y asina tapa enrikecimento y corupcion.
Observacionnan:
- Cuanto placa e tiramento di pinda aki, cu e meta pa sigui asesina e caracter di un ex-colega y miembro di 27 aña di partido, lo costa pueblo atrobe?
- Awor cu e ‘gran lider’ a admiti cu e proyectonan di ‘Tram, Parkeermeter y Wielklem’ a fracasa, pueblo lo scucha tambe si e ‘gran lider’, hunto su demas ministernan cu a sostene e proyectonan, lo saca nan conclusion politico? Y manera nan ta esunnan responsabel pa e fracaso aki, si personalmente nan lo bay paga pueblo bek e placa cu a wordo malgasta y e debenan di Aruparking? Of atrobe ta pueblo y Arubus (lesa pueblo atrobe) tin cu paga?
- Bo ta kere cu lo a bin un cambio den e maneho di ‘Parkeermeter y Wielklem’ of cu pueblo lo a haya gratis WiFi den caya grandi si no tabatin un campaña di pinta scur andando di un ex-miembro y colega di partido?
- Despues di tanto aña di mal maneho, debe biyonario, proyectonan di locura, enrikecimento personal di e grupito privilegia, insiguridad y entreguismo, ainda bo ta acepta asina facil pinda pa lubida tur esaki?
- Tirando algun pinda pa pueblo net prome cu Pasco y 11 luna prome cu eleccion, no por deshaci of drecha 7 aña largo di destruccion.
- Despues di Grecia, Canada, Spaña, Argentina, Italia y Gran Britania, awor e mayoria di pueblo Mericano a bisa ta basta cu e politico tradicional cu no ta scucha pueblo, cu ta sinti su mes un Dios y cu t’ey pa solamente sirbi su interes. Kisas e lo ta un bon idea si Aruba tambe sigui e desaroyo mundial aki y core cu e politico tradicional, enbes di sigui acepta mas pinda.
(www.aboaruba.org, This email address is being protected from spambots. You need JavaScript enabled to view it.)
Expresionnan haci den e articulo aki no necesariamente ta refleha opinion di ArenaPoliti.co
Articulo similar
7 motibo pa laga Pueblo eligi su Gabinete
Columna Asiento 22 | S01E05 Hopi ciudadano ta na fabor di un cambio den nos sistema democratico cu lo duna Pueblo e poder pa eligi Parlamento y un (minister-)presidente den eleccionnan separa. De...
Sigui lesa...