Si pueblo a tuma nota henter e aventura y gamblemento cu placa den parkeermeters ta 3 diferente grupo ta esnan cu a wordo afecta y a sali perhudica 1) comercio, 2) clase trahador y 3) e cumprador. Loke ta obvio ta cu a hisa benta e introduccion di parkeermeters pa ansha pa placa.
Lamentablemente den e proceso a keda falta hopi cos planificacion di infrastructura, un estudio riba efectonan sociaal y un estudio riba e impacto di cobra pa parkeer pa e negoshinan den centro di Oranjestad.
Basicamente e consecuencia ta cu Parkeermeters a bira e pesadiya sin solucion den Oranjestad. Desde cu Gabinete Eman a introduci e sistema di parkeermeters den te dia di awe no tin nada positivo a sosode y poco a wordo hasi pa mehora e sistema aki.

Realidad ta cu parkeermeters a causa un desaroyo negativo pa tanto comercio y e clase trahador. Benta di establecimentonan a cai drasticamente y hasta tin lugar a reduci nan personal. Es mas fraccion MEP durante bishita na varios negoshi a haya informacion clave for di comerciantenan cu e introduccion ta uno devastador pa nan. Netamente esaki ta wordo confirma cu e ultimo comunicado di KVK unda cu comercio ta pone un ultimatum pa gobierno pasobra bentanan a cai entre 30%-50%! Ademas e medida di parkeermeters ta uno cu ta afecta e entrada netto na un forma hopi brutal pasobra ta 720 florin e trahador ta kedando menos cune pa aña! Financieramente e ta devastador pa e clase trahador e ta un cobransa adicional cu ta afecta e presupuesto individual di tur cuidadano di Aruba. Imaginabo e 60 florin ey cu ta bai na parkeer hopi ta e famianan cu lo por a gaste na compras di fin di luna na supermarket of cubri cualkier gasto mensual di nan vivienda. E di 3 grupo cu e la afecta e "shopper" cu a keda disgusta cu e sistema y ni pa nada ta interesa pa bai Oranjestad pa cumpra algo djis pa evita mal experiencia cu parkeermeters. Obviamente e ultimo aki ta demotivante pa esnan cu ta hasi compras pasobra pa nan e ta un obstaculo.

Sigur ta di lamenta y condena e esfera di dictadura cu e sistema obligatoria aki a trece cune pa forsabo paga y consecuencia cu e la trece pa comercio y efectonan riba e cartera di clase trahador. Pueblo por saca e conclusion cu medida aki ta un di esunanan mas pura (sin planificacion) cu Gabinete Eman por a bin cune den centro di Oranjestad. Parkeermeters ta un di e ehempelnan den 2015 cu "sopi pura ta sali salo"!

Expresionnan haci den e articulo aki no necesariamente ta refleha opinion di ArenaPoliti.co