ORANJESTAD – Lider di MEP Evelyn Wever-Croes diaranson ultimo a tene un conferencia di prensa den Playa, pa pone atencion un biaha mas riba e problema serio cu parkeermeters ta causando. Tambe a bishita establesimentonan den Wilhelminastraat pa papia cu esnan cu ta traha den e tiendanan.

“Mi ta hopi preocupa, pasobra ya ta mas di un luna cu e parkeermeternan a wordo instala, y e danjo ta hopi grandi. Tiendanan ta evalua pa kita personal for di trabou, of di sera nan tienda.
Hende mes cu ta bishita Playa pa hasi compras no ta bin Playa pa miedo di haya un klem. Pa colmo hasta esnan cu a paga abbonement pa luna, nan auto a wordo geklem.
Esnan cu ainda ta bin Playa pa un respondi semper ta ansha y pura, y asina e tiendanan a mira nan benta baha di 20% te na 70% den algun tienda.
Tur esaki ta sangrando nos centro di cuidad hopi mas, cu el’a sangra caba durante 6 anja di gabinete Mike Eman. Prome tabata pa embeyese caya Betico Croes y pa pone e tram. Y e trabounan ey ainda no a caba, pero si a casi mata centro di cuidad.
Awor ta bin cu parkeermeters y e tiendanan ta haya otro sla fuerte.
ATIA, Camara di Comercio, gremionan en general ta contra e proyecto aki. Algun comerciante tabata simpatisa cu e intencion di e proyecto, pero ta asina desgusta con e proyecto a wordo implementa, y e timing pa wordo implementa, cu nan ta totalmente contra.

E trahadornan den e tiendanan ta esunnan mas afecta. Algun a perde trabou caba, otronan mester paga 600 florin pa anja pa por parkeer nan auto, y otronan mester cana den areanan peligoroso ora ta scur pa asina yega na nan auto.
E unico cu por ta contento cu e proyecto aki ta e minister Otmar Oduber cu a nombra su team di campanja den e compania nobo aki.
MI ta hopi preocupa, y despues di mi bishitanan awe, mi ta mas preocupa cu un luna pasa. Mi ta spera cu gobierno realisa cu no por sigi asina y cu bin un solucion pronto. Mi ta hopi satisfecho di e forma con nos ta wordo ricibi durante nos bishitanan, y mi ta nota cu e comerciantenan y e empleadonan ta keda hopi satisfecho cu nos a pasa serca nan y scucha di nan mes den kiko nan ta pasando. Un cos ta sigur, nan tur ta hopi decepciona den e gobierno di Mike Eman”, lider di MEP Evelyn Wever-Croes a duna di conose.

Expresionnan haci den e articulo aki no necesariamente ta refleha opinion di ArenaPoliti.co