Introduccion: Desde su introduccion ‘parkeermeter’ ta un problema. Paga pa staciona bo auto den Centro di Oranjestad y vecindario ta un medida di Gabinete Mike Eman, ehecuta door di su ministro di negoshi. Ta cobra te hasta trahador den Oranjestad y vecindario pa staciona su auto pa e bay traha! Pues ta mishi den salario di e trahador pa por paga huur di famia di ministro di negoshi.
Edificio: A huur un edificio den Centro di Oranjestad cual ta un gasto innecesario. Esaki ta un muestra cu kier entrada riba lomba di trahador pa enrikece famia. Por a crea un espacio na Arubus por ehempel y ubica e oficina eynan sin e gasto di huur. Ta aki ta unda e rabo di porco ta krul! Mester tin ganashi directo of indirecto pa e ministro di negoshi.
Arubus: Entrada di Aruparking supuestamente ta pa yuda sanea e situacion financiero di Arubus N.V. Wel wel!! Esun cu a daña finanza di Arubus ta e propio ministro di negoshi. El a sigui ehempel di su amo, ministro di engaño cu a manda Aruba bancarota. Mal decision a wordo tuma pa cu compra di bus, cuenta bancario di Arubus supuestamente a wordo ‘gehacked’ y no a drecha e servicio di transporte di bus tampoco pa publico.
Bus electrico: Locura di ministro di engaño a pone cu a cumpra un bus electrico. Un bus cu a core, ban bisa un dia, a bay ‘tank’ na WEB y nunca mas nos a wak’e. Un aventura cu placa di pueblo, cu placa di e clase trahador. Un proyecto cu a conoce un morto natural.
Mas bus: E otro busnan cu a wordo cumpra door ministro di negoshi ta supuestamente mas barata. A resulta cu e busnan ta mas para den garashi cu nan ta core. Si nan ta riba caminda, e peliger di pega candela ta grandi of cu un tayer ta rementa ta grandi. Pues mal decision pa compra di bus di mal calidad.
Misterio: Pa colmo de los colmos cuenta bancario di Arubus a wordo ‘gehacked’. Algo masha straño mes! Mas straño ta cu ministro di negoshi no a exigi investigacion penal mesora. Awor si Ministerio Publico a dicidi di bay investiga ta kico a pasa. Yah, mihor laat cu nunca! Door cu basta placa a wordo ‘gehacked’, ministro di negoshi a pone medida indirecto pa e clase trahador.
No airco: Ministro di negoshi a dicta pa paga e airco den e busnan. Cu airco paga e bus lo gasta menos gasolin y esey lo spaar placa. En particular e trahador di San Nicolas a sufri. Ta kico e trahador aki, cu ta traha den e sector turistico na Palm Beach a haci ministro di negoshi pa wordo castiga asina?? Un decision descabeya atrobe contra e clase trahador.
Efectividad: Mester a bini cu un maneho cu ta atrae mas cliente pa haci uzo di bus. Mas cliente ta nifica mas entrada y ta alivia e presion financiero di Arubus. Paga airco den bus no ta atrae mas hende pa haci uzo di transporte publico. Pues awor ministro di negoshi ta scoge pa castiga mas trahador. E biaha aki esun cu ta uza auto.
Mas medida: Cobransa di ‘parkeermeter’ ta wordo reparti 50-50. Mitar di e entrada ta bay pa Arubus y mitar pa Aruparking. Un medida ficticio cu no ta yuda Arubus cu nada. Placa di huur si ta un entrada mas pa famia.
Solo ta Sali: Solo ta sali pa e clase trahador tambe. Movimiento Electoral di Pueblo ta un partido cu ta para banda di e clase trahador y husticia social. E abuso aki lo yega na su fin. Lo mehora servicio di bus, pone airco on den bus y lo bin cu maneho efectivo di transporte publico.

Expresionnan haci den e articulo aki no necesariamente ta refleha opinion di ArenaPoliti.co