Gañamento formal y manipulacion ta sigui! 

Hopi biaha bo tin cu puntra bo mes si ta gevoel mes e mandatarionan di AVP a perde cu nan manipulacion y mentiranan? Esaki ta wordo comproba un biaha mas ora scucha e declaracion di minister Otmar Oduber, kende den un conferencia di prensa a trece padilanti cu ta su persona  tabatin “e honor di introduci e prome bus cu airco na Aruba”. Increibel e mentira y manipulacion aki di un minister cu a perde tur clase di berguensa y gevoel, ya cu e declaracion aki e mes ta comproba cu e ta un mentiroso patologico.

E promer bus cu airco
E realidad ta cu e promer bus di Arubus cu airco cu a ser introduci na Aruba tabata na aña 2008, esta durante Gabinete Oduber y MEP. E bus aki tabata uno Chines di marca Yutong, cu a wordo malamente chercha door di partido AVP. Esaki tabata den cuadro di un proyecto piloto pa wak con tecnicamente e bus aki ta funciona riba careteranan di Aruba. Gabinete Oduber como un gobierno social democrata a sali di e pensamento cu introduccion di airco den e busnan no ta un luho mas mirando e calor sofocante cu ta reina diariamente riba Aruba. E airco den e busnan siguramente lo sali na beneficio y salud di e pasaheronan y tambe di e chauffernan di bus.

Otmar a haya cama cla drecha
Despues cu e bus Chines aki a core y test durante 1 aña largo y cu e resultadonan di tur test tabata positivo, e ora ey numa Gabinete Oduber y gerencia di Arubus a dicidi pa cumpra 10 bus Chines Yutong cu airco di China. Esaki tabata mey mey di 2009 y e 10 busnan aki a yega Aruba den luna di October 2009 , esta net despues di eleccion di 27 di September 2009. Y naturalmente ora cu Otmar Oduber a bira minister na November 2009 el a haya e cama cla drecha pa e por drumi riba dje y su unico contribucion y show tabata pa corta cinta pa loke ta introducccion di e busnan cu airco aki. Pues ta bisto cu e minister aki no tin arte ni parte den introduccion di bus cu airco na Aruba. Bay gaña baca!

Otmar a corta den airco y subsidio
Sinembargo ta bon pa recorda pueblo tambe cu ta e mesun Otmar Oduber aki a dicidi – despues di algun luna cu e tabata den funcion di minister – pa stop (boycott) tur e busnan Chines aki pa core cu airco y pa nan core cu bentananan habri, lagando tur e pasahero y e chauffeurnan di bus keda sofoca tur dia den e calor inmenso cu ta reina den e pais aki. E motibo cu el a duna tabata cu –coriendo e busnan aki cu airco – esaki lo sali e compania hopi placa na uzo di diesel. Bo mester ta un minister sin curason y inhumano pa haci algo asina cu esnan mas vulnerable den comunidad! Tambe den su rabia y odio el a corta 4 miyon florin den e subsidio di 6 miyon florin cu te cu 2009 Arubus tabata haya for di gobierno y awe e minister ta a punto pa elimina e subsidio aki completamente. Y pa logra esaki y pa cera e buraco financiero el a dicidi di bin cu e proyecto fracasa di meternan di parkeer.

Un fracaso total
Un hecho condenabel tambe ta cu ta apenas 3 aña pasa e minister aki a laga cumpra 15 bus nobo marca International y di cual uno a kima completamente algun siman pasa, cu a resulta den un fracaso y desaster total ya cu e busnan aki ta esunnan di mas malo cu Arubus a yega di conoce den su historia. Un suma astronomico di mas cu 350 mil florin a ser paga pa cada un di e busnan aki y cu ta suma den total mas cu 5 miyon florin. Pues, placa benta afo cu Arubus ni gobierno tin awor aki.Y pa tapa su fracaso e minister recientemente a dicidi di bay cumpra (cu placa fia!) algun bus di Volvo y Marco Polo, siendo cu ni 3 aña pasa el a cumpra caba 15 wacharaca asambla na Mexico. Esaki por ser considera como “een doekje voor het bloeden”, ya cu a keda demostra un biaha mas cu e minister aki no tin ningun clase di credibilidad y a converti su mes den un ministro mentiroso di puro show y fantasia.

Expresionnan haci den e articulo aki no necesariamente ta refleha opinion di ArenaPoliti.co