Fuera di Minister President Mike Eman, tin un otro minister den Gabinete Eman cu tin e faha pa gaña y sin ningun tiki di berguensa kier sigui gaña pueblo, esta e tal Otmar Oduber. Den tur su gañamentonan di ultimo tempo relaciona cu e prijs exorbitante cu a ser paga pa e wiel klemnan, awor un biaha mas den su conferencia di prensa di e siman aki el a trece padilanti cu  a stop e uso di airco den e 13 busnan Chines pa motibo cu den apenas 1 aña y mey cu e 13 busnan a yega Aruba, tur di nan nan airco a daña. Tambe el a declara cu “tur bus sin airco of cu airco daña a wordo cumpra den periodo di MEP”. E declaracion aki ta hopi straño, ya cu no ta e minister aki mes a declara algun siman pasa den su conferencia di prensa cu ta danki na su persona pais Aruba a cera conoci cu e promer busnan cu airco y cu esaki tabata su gran logro? Alavez ta increibel con e minister aki den tur su gañamentonan a bolbe bruha den cifra, ya cu e cantidad di busnan cu Gabinete Oduber a cumpra for di China tabata 11 y no 13! Ta pesey tin un dicho cu ta bisa cu “ora bo kier gaña, bo tin cu gaña bon, sino keda den bo ignorancia”.

E ‘luho’ di airco den bus
No tin palabra pa describi tambe e mentira di Otmar Oduber di cu el a stop e busnan Chines di core cu airco ya cu tur e airconan di e busnan Chines a daña den un periodo hopi cortico. Sinembargo lo ta bon pa refresca Minister Otmar Oduber su memoria locual a ser treci padilanti den prensa na juni 2011, esta apenas un aña y mey cu e tabata sinta como minister: LO STOP 11 BUS DI ARUBUS CU TA CORE CU AIRCO Y SPAAR 300 MIL FLORIN PA AŇA. “Hunta di Comisario (lesa: Minister Otmar Oduber) a tuma un decision cu lo bay stop usa airco den e busnan di Arubus. Actualmente tin un total di 38 bus den e flota di Arubus, pero 11 di e busnan aki tin airco. E luho aki ta loke entrante e siman aki lo NO existi mas. Arubus tin un gasto hopi halto mientras cu entradanan a cay y diesel ta hopi caro. Ta poco tempo pasa cu a introduci e busnan Chines cu airco. E calculacion ta mustra cu si spaar 300 mil florin pa aña nifica tambe cu ocho hende menos tin chens di perde trabao na Arubus”. Ay ta pica, Otmar!

Yutong versus International
Cu e declaracion cla y raspa aki partido MEP ta keda te aki, ya cu no tin sentido di sigui discuti cu un mentiroso cu no kier admiti cu e ta e autor principal cu na 2011 a corta e ‘luho’ di airco den e 11 busnan Chines y asina perhudica tur e pasahero y chauffeurnan di bus lagando nan sufri den e calor insportabel cu ta azota nos pais diariamente.

Por ultimo, toch lo ta bon pa Minister Otmar Oduber aclara lo siguiente: Di con 11 bus Chines Yutong por a costa den total solamente 2 miyon florin y di cual despues di 6 aña e gran mayoria ta coriendo ainda optimalmente, anto 15 bus International costando 5 miyon florin, despues di 3 aña mayoria di nan a resulta den un fracaso total y cu te hasta un di nan a kima completamente?  E fotonan di e bus Yutong y esun International ta papia pa nan mes!

Expresionnan haci den e articulo aki no necesariamente ta refleha opinion di ArenaPoliti.co