STA CRUZ -- Lider di MEP Evelyn Wever-Croes a bolbe expresa su preocupacion pa cu e criminalidad cresiente na nos pais. Nos mester enfoca mas riba hobennan problematico y cu ta cai den e circuito di criminalidad. Mas y mas hoben di edad jong ta drenta gang, ta involucra den violencia of ta comete atraco.

Locual ta mas lamentable ta cu ya nos no por manda hobennan problemático Corsou mas pa tratamento y rehabilitacion, pasobra Aruba no ta paga su cuentanan eynan, y ya a cuminsa manda cliente Aruba bek. Minister di Husticia Dowers nunca kier a reacciona riba e ponencia ey, ni tampoco kier a contesta e pregunta con grandi e debe ta y con lo soluciona esaki. Evelyn Wever-Croes a hasi hopi pregunta na varios ocasion den parlamento con ta para cu tres di e instancianan cu ta encarga cu cuido di nos hobennan.

Voogdijraad: ta un departamento cu falta masha hopi personal, y awor ta kitando mas trahador social; si awor caba nan no tin suficiente hende pa hasi e trabou, dicon ta kita mas? Tin centenares di caso pendiente, algun desde 2012, pero e minister no kier a duna e parlamentario cifras exacto di cuanto caso tin pendiente, y con esaki ta influencia bienestar di nos hobennan.

Fundacion Guiami: tin falta di personal grandi, y no por cu tur e trabou, y sin un aprobacion di e fundacion aki no por brinda ayudo na hobennan ni nan famia. Cuanto caso tin pendiente e minister no kier a divulga, ni tampoco con e lo soluciona e problema aki.

Orthopedagogisch Centrum (OC): e cas aki den cual ta ubica e hobennan, ta completamente yen y tin lista di espera largo. Cuanto hende ta riba e lista di espera, e minister no kier a bisa, ni tampoco con e ta bai soluciona e problema aki. Unico cos cu e minister a bisa ta cu mundialmente e OC-nan ta bahando cantidad di cama, pero esey ta OC-nan cu semper tabata tin suficiente lugar, y no manera e caso na Aruba.

“Nos tur conose e problema di criminalidad bou di nos hobennan. Si nos no actua, nan ta drenta circuito di criminal. Tin listanan di espera hopi largo na cada un di e instancianan ey, y ami kier wak accion wordo tuma mesora. Lamentablemente e minister mes no ta mustra interes. P’e esaki no tin prioridad, y mi ta lamenta esey. Mi a segura e minister cu e por conta riba sosten di parlamento pa kita placa di otro caminda y ubike den su ministerio, pa e por yuda e hobennan aki. Nos a hasie caba na juni 2012 caminda nos a saca 8.9 miyon for di otro gasto di gobierno, y ubike den ministerio di husticia pa yuda e minister combati criminalidad, pero e fraccion di AVP a vota contra! Nos kier mira un solucion, pasobra e realidad na Aruba ta doloroso.

Fraccion di MEP ta reuniendo cu varios instancia den nos comunidad pa scucha nan experiencianan, y especialmente pa scucha con por yuda nan. E tipo di reunionnan aki ta sumamente fructifero pa nos prepara pa reunionnan di begroting 2016 cu proximamente lo wordo trata den parlamento. Aruba merece mihor, nos hobennan merece mihor, y pesey nos kier pa prioridad wordo duna na nan”, lider di MEP Evelyn Wever-Croes a duna di conoce.

Expresionnan haci den e articulo aki no necesariamente ta refleha opinion di ArenaPoliti.co