Parlamento a manda yama minister di husticia Arthur Dowers pa duna cuenta kiko e ta hasiendo pa frena e ola serio di criminalidad, cu tin henter nos pueblo azota.
Mester remarca cu minister Dowers mes tabata masha trankil, y te hasta arogante, y a laga sa varios biaha cu e no por hasi nada mas, ni ningun minister despues di dje por hasi nada mas pasobra no tin placa. Ningun momento el'a hasi e minimo intento di mustra cu e ta preocupa cu e situacion cu ya a sali for di man.
Fraccion di AVP no a sostene e mocion di desconfiansa di fraccion di MEP, pero si a pone minister Dowers bou di curatela. Esey ta bisa hopi. AVP a pasa un mocion den cual nan ta URGI minister Dowers pa fortifica su maneho. Kiermeen, su maneho ta slap y e parlamentarionan kier pa e ta mas fuerte. AVP a bisa tambe cu e minister mester RAPORTA cada 6 luna na Parlamento cu cifras! Algo cu e minister no a hasi nunca den 5 anja.
MEP a vocifera cu e mocion aki ta bisa hopi, pasobra na momento cu e fraccion cu mester defende e minister den parlamento mes pone bou curatela di e forma aki, esey ta bisabo hopi. 
Pa MEP e no ta fuerte suficiente MEP no ta kere cu e minister aki por soluciona e problema, ni e gabinete Mike Eman. Sinembargo, e ta un senjal hopi fuerte pa e minister si, cu e no tin asina tanto sosten mas den e fraccion berde den Parlamento.

Expresionnan haci den e articulo aki no necesariamente ta refleha opinion di ArenaPoliti.co