Fin di otro luna lo yega 6 bus nobo cu airco  

Minister di Transporte, Otmar Oduber, desenmascarando e diferente mentiranan presenta pa partido MEP, a elabora riba e parti di busnan di Arubus. Den ultimo tempo por a mira un campaña ta wordo hiba bisando cu e busnan ta den mal condicion, cu no tin airco of cu airco ta daña.
“Tur, pero tur bus awe sin airco of cu airco daña, a wordo cumpra den periodo di MEP”, Minister Oduber ta splica. Inclusive el a bisa cu e 13 busnan Chines cu a wordo cumpra dor di gobierno anterior e mes a ricibinan na final di 2009 cuminsamento di 2010. E busnan aki despues di 1 aña y mey ningun di e airconan tabata traha mas. Pero e storia di e busnan aki ta bay mas aleu. E tempo aya a manda empleadonan pa Trinidad & Tobago pa wak e bus Chines, pero despues ora e 13nan a yega for di China, e tabata full un otro marca cu esun cu e trahadornan a wak.
Tambe e mandatario a bisa cu practicamente no tin pieza pa e busnan Chines aki y debi cu mester bestel pieza pa nan, ta haya cu tin biaha nan ta keda para.
E unico busnan cu si ta trahando awe y cu si tin airco ta esunnan cu a wordo cumpra via e compania International cu ta esunnan cu a wordo cumpra 2 pa 3 aña pasa. Na momento cu a presenta un of otro problema cu nan, esaki ta wordo resolvi rapidamente.
Minister Oduber a informa tambe cu si tur cos ta bon pa fin di november of cuminsamento di december lo yega 6 bus nobo cu airco y lo ta di marcanan Marcopolo y Volvo debi na e durabilidad di e busnan aki.
Minister Otmar Oduber no ta bisa cu esaki cu Arubus ta completamente den un bon direccion, e compania di transporte publico a pasa den hopi dificultad. Ora e mandatario actual a asumi responsabilidad ministerial 6 aña pasa e compania aki tabatin casi 1 aña sin paga su impuestonan, tabatin busnan sumamente bieu coriendo rond y poco poco ta mehorando e posibilidadnan den Arubus pa por tin un flota cu ta un tiki mas na e nivel di servicio cu kier brinda mantendiendo tur e subsidionan y cu hopi pasenshi di e trahadornan.
Gobierno di Aruba ta subsidia un promedio di casi 70% di e costonan di Arubus y pesey a tuma e decision di en bes di pone e parkeermeters den man di un compania priva a dune na un compania estatal pa su ganashinan por bay pa mantene y baha e gastonan di Arubus.

Expresionnan haci den e articulo aki no necesariamente ta refleha opinion di ArenaPoliti.co