Prome Minister na inicio di Fase 3 di FCCA na Kiviti. 

ORANJESTAD – Minister President Mike Eman a cuminsa na bisa cu “ta un gran satisfaccion pa mira cu un gran bario cu un sentimento asina comunitario,” manera ta trata Kiviti den seroenan di San Nicolas, ta iniciando otro fase di e compleho di vivienda pa comunidad. Premier Eman conoce e bario y su hendenan despues di a cana bishita cada un algun tempo atras y durante cual e aspecto cu a resalta mas tabata e sentido di convivencia cu tin entre bisinanan. “Mi por a constata con un bisiña ta yuda otro tene area limpi; mientras otro ta yuda esnan di edad of cu handicap.” Pa su persona ta hopi importante pa ora bo mira e ingredientenan di calidad aki sigui cu un expansion.

Minister President ta gradici FCCA pa e iniciativa y a elogia su director van Poppel pa kende el a pidi un aplauso. Un persona cu ki ora cu yam’e, ta duna henter su cooperacion, pero a duna di conoce cu pronto lo inicia su proceso pa baha cu pension. Premier Eman a haci publico su apelacion pa reconsidera y keda na e funcion un tempo mas. Tambe a elogia henter e ekipo su tras, como tambe Minister di Infrastructura y DOW.

Na e ultimo departamento aki a transmiti di biaha e peticion di e habitantenan di Kiviti pa pone verkeersplateau. Asina por percura cu trafico ta suavisa y ta resalta e seguridad. E mandatario a garantisa cu luz tambe ta yega pronto ya cu e proyecto di Luz den Bario ya ta trahando den e areanan pariba di brug.

“Pa nos sigur ta un satifaccion cu dentro di algun siman of luna por entrega e yabi na un cantidad grandi di ciudadano cu ta wardando pa un cas. Hunto cu FCCA ta bay construi un cantidad grandi den e periodo aki. Minister Sevinger ta traha incansablemente riba midimento di tereno pa entrega tereno pa construccion di cas propio,” asina e mandatario a afirma.

Pronto lo ta para na pia di e proyectonan aki pa percura cu loke Gabinete Mike Eman II a bin ta haci den renobacion di bario. Ta bay sigui pone acera, pone luz y parke y unda cu ainda tin necesidad pa vivienda; percura pa tur cu ta busca hogar, hende hoben, grandi, tur por yega na un cas. 

Expresionnan haci den e articulo aki no necesariamente ta refleha opinion di ArenaPoliti.co