PPA a hanja den nos poder un carta cu un grupo di commerciante di centro di Oranjestad a dirigi na November pa Min Presidente Mike Eman den cual nan ta puntra su persona pa tuma un cantidad di medida pa salba centro di Oranjestad. Ta worde pidi pa: A. Stop Aru-parking inmediatemente B. elimina e streettrolley y habri caya pa trafico. C. Establece un moratorium riba sitionan di retail-shopping pafor di caya grandi. D. introduci un pakete di incentivo pa trece negoshi bek den centro di Oranjestad.

E carta su tono ta uno cu ta refleha un preucupacion enorme y e mensahe na Min Pres Mike Eman ta cu locual gobierno kier hasi awor ta ‘to little to late’. Ta referi na un cantidad di negoshi cu a sera kaba y ta informa cu lo tin varios mas pensando di sera porta dentro di poco. Ta bisa claramente ‘we no longer have the luxury of time we need inmediate action’.

Tambe e carta ta referi na 4 otro carta cu a worde manda pa e tempo ey Ministro Otmar Oduber y ta bisa hopi cla cu e carta fecha 9 di November 2016 por worde considera como e ultimo esfuerzo di parti di comerciantenan.

Partido PPA a hiba un oposicion pafor di parlamento contra establecimento en todo caso di ARU-PARKING !! Nos a informa gobierno den un racha di declaracion cu Aruba no ta cla pa un sistema di pago pa ‘parkeer’ obligatoriamente. Sigur no ora cu esaki a worde introduci pa Conseho di Ministro/Ministro Otmar Oduber den un periodo cu ja kaba nos pueblo ta bibando bao di un racha di medida a consecuencia di e crisis financiero y e debe nacional causa pa x Ministro di Finanzas sr. Mike de Meza su maneho fatal.

PPA a suplica, pidi despues demanda un fin na e Aventura cu jama Aru-parking y tabata e unico partido cu a propone pa hasi e instancia aki un ARU guide & service pa nos bishitantenan y pa nos pueblo local pa ora nan bishita Oranjestad.

Oranjestad nos capital tin un valor historico y commercial y Aruba no por permiti su mes pa Oranjestad bira un sitio unda un gran majoria di pueblo NO ta desea di bishita mas. Pesey PPA ta ripiti nos peticion na Conseho di Ministro basa riba un eror grandi y hopi serio di parti di Conseho di Ministro pa pone un final na e ‘subsidio’ na Arubus basa riba cual a introduci e ARU-PARKING!! E introduccion aki a destrui e centro commercial di Oranjestad. Y pa salbele gobierno mester pone un paro na ARU=parking inmediatamente.

Pa locual ta trata e servicio di e ‘street-trolley’ PPA lo analisa esaki den nos seno prome cu nos bin cu nos opinion al respecto. Pero no kabe duda cu Conseho di Ministro lo mester evalua esaki debidamente.

E idea pa introduci un pakete di incentivo pa stimular desaroyo den centro di Oranjestad, PPA ta sostene debidamente. Especialmente despues cu Oranjestad a ricibi asina hopi sla a consecuencia di e ‘rol’ cu ARU-PARKING a hunga. Tin un bon parti di nos pueblo cu NO ta bishitando Oranjestad mas simpelmente pasobra nan no kier paga pa infra-structura cu ja kaba e pueblo su belasting a paga pele. Simpelmente esaki ta e abuso di gobierno di AVP cu pueblo a rechasa formalmente.

Na e momento aki nos ta den e temporada di pascu……PPA ta propone na gobierno pa pone un paro inmediato na e servicio di ARU=parking y cambia nan tarea pa uno positivo !!

E topico aki ta uno serio y mester di atencion debido di parti di gobierno…..te na e momento aki nan action di berdad ta ‘to little to late’.

PPA lo bin bek riba e materia importante aki !!


ARUBA, 15 di December 2016
Lider Politico di PPA
BENNY NISBET

Expresionnan haci den e articulo aki no necesariamente ta refleha opinion di ArenaPoliti.co