Paul Gibbs (MEP): Minister Oduber kier culpa tur hende menos su mes pa loke ta deterioro di Caya Betico Croes
Paul Gibbs di MEP:
Minister Oduber kier culpa tur hende menos su mes pa loke ta deterioro di Caya Betico Croes
Ta increibel pa mira Minister Otmar Oduber recientemente haci poco salto mortal p’asina defende su maneho caotico y descabeya relaciona cu e situacion di comercio den Caya Betico Croes. Varios di e ponencianan di e minister aki ta carece di argumentonan solido y ta muestra cu e no tin control y ningun solucion concreto pa contraaresta e problematica den e mundo comercial.
Aruparking a caba cu Caya Betico Croes: Minister Oduber kier culpa e situacion di antes relaciona cu e deterioro di Caya Betico Croes, pero esaki no ta cuadra cu realidad ya cu ta despues di introduccion di e tram e benta a baha drasticamente y comerciantenan mester a lucha pa por a mantene nan tiendanan habri aunke cu solamente un tiki ganashi. Sinembargo, despues cu Minister Oduber a bin cu Aruparking dentro di 1 siman e benta a baha cu mitar of mas.
Caya Betico Croes tabata semper pa local: Otro smoesje di Minister Oduber ta cu tin mallnan dilanti di e hotelnan. Aki bo por wak cu Minister no a haci su huiswerk drechi pasobra e gran mayoria di turistanan stay-over nunca tabata esnan cu tabata cumpra den Caya Betico Croes. Ta nos localnan tabata esnan cu semper tabata bishita y haci compra den e caya menciona.
Tiendanan potencial a cera nan porta: Si bo wak e smoesje di Minister Oduber cu ta comerciantenan mester bende mas varia y mester haci mas promocion pa por atrae cliente, anto kico Minister ta pensa di tiendanan manera Shana, Crocs of Velez cu ta tiendanan full apart pero toch mester a cera nan portanan? Pues e ponencia aki no ta cuadra.
Dicon stroba mas benta: Minister kier culpa online shopping. Berdad esaki a reduci e benta, pero e sistema di shopping aki tabata t’ey hopi prome cu minister a bin cu Aruparking y si bo ta un hende cu un tiki inteligencia bo ta compronde cu si tin factornan cu ta stroba benta, bo no ta bin cu un otro medida cu ta haci e problema ainda mas grandi.
Tiendanan mester habri te mas laat: Minister Oduber ta bisa cu e tiendanan mester adapta y cuminsa habri te mas laat, pero Minister a lubida cu na cuminsamento su persona mes a gasta hopi placa di pueblo pa laga gruponan musical toca den caya anochi y e por a ripara cu no tabata tin un alma den caya. E minister aki no ta comprende cu si ta bin cliente mas laat anochi automaticamente tiendanan lo keda mas largo habri? Tiendanan no ta cera si ta bin hende. Nan ta cera pasobra ya no tin cliente mas.
Finalmente, locual minister tin cu haci ta stop di culpa tur otro factor y hende, asumi su responsabilidad y elimina Aruparking pa duna Caya Betico Croes un bida atrobe.
Expresionnan haci den e articulo aki no necesariamente ta refleha opinion di ArenaPoliti.co