Gabinete ME II: Cu hopi dinamismo Minister Arends a inicia serie di reunion cu departamentonan di sector economico
![161201 sector economico richard](/cache/klixowatermark/52d453aabc33f9ab5ff2a4e8237c5983.jpg)
ORANJESTAD –Un encuentro personal cu hefenan di e diferente departamentonan cu ta resorta bou di e Ministerio di Asuntonan Economico ta entre e prome pasonan cu e recien huramenta Minister mr. drs. Richard Arends a tuma. Riba su prome dia den funcion, Minister Arends a reuni cu Director y Director Adhunto di Directie Economische Zaken, Handel en Industrie (DEZHI), esta sra. Maria Dijkhoff-Pita y sra. Shuhaila Maduro.
Hunto cu Departamento di Asuntonan Economico, minister Arends a sondea posibilidadnan pa garantiza un miho ‘level playing field’ pa comercio local y brinda proteccion e companianan mediano y chikito unda cu por. Den liña cu maneho di Minister de Meza cu tabata encarga cu e cartera di Asuntonan Economico, minister Arends a palabra cu su departamento cu lo ahusta e maneho di establecimento pa asina por garantiza un miho competencia. “For di aña 2010, Gabinete Mike Eman ta promoviendo mas y mas un economia di conocemento. E reapertura di refineria ta duna nos un empuhe pa sigui diversifica nos economia,” minister Arends a declara.
E encuentro aki ta e prome di varios mas cu ta sigui cu e titular di Asuntonan Economico a programa riba su agenda pa asina comparti cu e instancianan concerni indicacionnan di e proceso di transicion di responsabilidad di colega Mike de Meza, pa su persona. Hunto cu e departamentonan di sector economico, minister Arends su maneho lo enfoca ampliamente riba economia. Den un cooperacion estrecho cu Minister de Meza encarga cu Turismo y Energia lo hiba un maneho integral pa yega na e crecemento economia premira y traduci esaki ta bienestar pa un y tur.
Expresionnan haci den e articulo aki no necesariamente ta refleha opinion di ArenaPoliti.co