AVP mester stop di ta negativo. 

ORANJESTAD – “Partido AVP a bira un partido hopi negativo. Ultimo tempo cada rato bo ta tende nan bisa cu "NO POR, NO POR, NO POR".
Nada no por mas. Si ta pa nan biaha of fiesta, e ora si por. Pero si ta pa pueblo, nada no por mas! Ami ta cansa di scucha kico tur NO por, bisami kico si por.”

Lider di MEP, sra Evelyn Wever-Croes a duna 3 ehempel di e actitud negativo di Mike Eman y partido AVP.

1. CASTIGO MAS SEVERO PA ABUSADOR SEXUAL
Mas di 6 aña pasa un mama balente a bin Parlamento cu 11 mil firma y pidi pa castigonan mas severo contra abusadornan sexual, entre otro pa introduci castigonan minimo.
Nos fraccion mesora a traha un iniciativa di ley y a entrega esaki na Parlamento.
Na september 2010 Raad van Advies a duna conseho y a sugeri cierto cambionan y nos a haci tur e cambionan cu excepcion di un cu nos mes no por traha pasobra ta gobierno mester trahe: un parafo den cual ta describi e maneho di gobierno di Mike Eman pa cu castigonan minimo. Ya na september 2010 nos a cuminsa manda carta pa gobierno pa pidi gobierno manda nos nan maneho y nan vision pa nos por continua cu e ley.
Despues nos a manda varios recordatorio. Sinembargo te dia di awe Gobierno no a contesta nos peticion y pesey e ley ta pega ainda.
Unico cos cu bo ta scucha ta Parlamentarionan di AVP hopi negativo ta bisa NO POR, NO POR, NO POR.
Esey nan a haci tambe ora nan a vota CONTRA di un mocion di MEP pa bin cu e castigonan aki.
Mi ta cansa caba di tende nan bisa cu no por, bisami kico SI por pasobra mientras cu AVP ta stroba e ley pa wordo finalisa, e abusadornan sexual ta sigui abusa y cada mucha cu wordo abusa, ta un dimas. Ban stop di ta negativo y pone nos energia den con SI pa protehe nos muchanan mihor.

2. AUMENTO DI PENSIOEN DI NOS GRANDINAN
Durante un reunion publico algun luna pasa tocante e fondonan di SVB, fraccion di MEP a propone den un mocion pa hisa e pensioen di nos grandinan cu 2.5% mescos cu e sueldo minimo a wordo aumenta e aña aki. Pero e parlamentarionan di AVP un biaha mas a mustra con negativo nan ta, y a vota CONTRA e aumento di pensioen di biehes, pasobra segun nan e grandinan ya a haya un aumento caba.
Esaki ta un argumento cu nos no ta compronde, pasobra unda cu bo bay bo ta topa pensionadonan ta bisa bo cu nan no por biba di nan pensioen.
Pesey ta increible con parlamentarionan di AVP ta asina negativo y ta bisa NO POR, NO POR, NO POR! Si nos por confia e informacion di SVB - cu nos no tin ningun motibo pa duda - cu e fondo di AOV ta solido, y hasta por a regala Mike Eman 61 miyon florin, nos grandinan tambe merece y por haya un aumento di pensioen. Ban stop di ta asina negativo y ban pone tur energia positivo hunto pa mustra con SI nos por.

3. BAHA EDAD DI PENSIOEN NA 62 AÑA 
Un otro actitud negativo di AVP bo por mira ora cu MEP menciona cu lo baha e edad di pensioen bek na 62 aña. Mesora AVP a cuminsa: "NO POR, NO POR, NO POR". Dicon no por? E fondo ta solido atrobe y hasta a regala Mike Eman 61 miyon florin pa nan por tapa nan buraco financiero cu nan a causa cu tanto biahamento y fiestamento.

Pa tapa e buraco ey nan a busca un regalo serca SVB di 61 miyon florin! Nos ta bisa: si e fondo ta solido, por baha e edad di pensioen bek te na 62 aña. Y nos lo haci esey ni cuanto AVP grita cu NO POR!
MEP ta kere cu SI por! Pasobra nos grandinan merece miho.

Pesey nos ta bisa AVP: ban stop di ta asina negativo y ban wak con SI por trese alivio den nos comunidad di tanto medida cruel cu Mike Eman y su gobierno a bin cune.

Solo ta sali pa nos tur y asina nos di MEP lo percura pa brinda proteccion y mehora calidad di bida di nos muchanan y di nos grandinan, esey ta nos compromiso!”, segun Evelyn Wever-Croes, lider di partido MEP.

Expresionnan haci den e articulo aki no necesariamente ta refleha opinion di ArenaPoliti.co