Den un relato di prensa den cual Minister Dowers a informa riba su biahe pa Hulanda en coneccion cu e reunionnan di Ministernan di Husticia di Reino Hulandes, nos por a haya un bista di kiko tur a keda acorda durante e reunionnan aki. Un acuerdo cu sigur a resalta ta esun na unda cu Minister Dowers ta informa cu “a repasa e asunto di ‘vreemdelingenketen’ den e paisnan. Aunke cu na Aruba maneho di estranheria ta resorta bou di Minister Benny Sevinger, toch den e otro paisnan den Reino e maneho ta cay bou di husticia. A acorda cu lo evalua esey tambe dentro di poco.” For di e frase aki nos por deduci cu e cartera di extranheria dentro di poco lo wordo kita for di Minister Sevinger y lo ser duna na Minister Dowers di Husticia.

E noticia aki no ta bin di sorpresa ya cu na augustus 2014 caba nos a mira presencia di Secretario General di Husticia di Hulanda, sr. Gerard Roes, na Aruba. Den un medio di comunicacion a keda publica cu e bishita aki lo tabata den cuadro di e situacion problematico di imigracion na Aruba, e proceso di extranheria y tambe pa atende posibel iregularidadnan den e departamento di Dimas pa cual mester un atencion di forma mas serio. E informacion aki ta cuadra cu e kehonan cu ta ser treci dilanti den Pueblo na unda ta wordo bisa cu hendenan serca di e Minister di Extranheria lo ta tuma placa pa regla permiso, cu bou di e capa di permiso pa trahador domestico hopi permiso ta wordo duna na un manera iregular, na unda hasta ta wordo bisa cu despues di ora di trabou ta drenta den Dimas pa cambia informacion den computer y na unda e mandatario lo ta pone precion pa permisonan wordo regla. Kizas e kehonan aki a yega na oido di e Minister di Husticia di Aruba tambe y pesey awor enves di busca moda pa castiga esnan responsabel, lo ta buscando un salida elegante pa Minister Sevinger.

Si e informacion cu ta circula den Pueblo ta veridico, anto e ora ta di spera cu Minister Dowers y Ministerio Publico haci lo corecto pa denuncia y persigi esnan cu ta abusa di e leynan di nos Pais. Pero for di e relato di prensa di Minister Dowers ta bira bisto cu e cartera di extranheria lo djies wordo kita di Minister Sevinger y duna na Minister Dowers. Ta keda na e mandatarionan en cuestion pa splica y desmenti tur cos, pero tempo lo demostra nos kiko ta e motibo real pa cual e cartera di extranheria lo wordo kita di Minister Sevinger.


20 januari 2015

Expresionnan haci den e articulo aki no necesariamente ta refleha opinion di ArenaPoliti.co