Aña 2015 ta habri cu gobierno di Gabinete Mike Eman II riba e mesun ritmo. Nos por wak anuncio di construccion di un Welcome Plaza y cu lo bin 3 tram mas. Un Promer Minister ta habri aña ta anuncia cu tur school lo haya solar panels riba nan daknan. Prioridadnan totalmente robes, mientras cu den presupuesto 2014 a corta riba 9 miyon den enseñansa cu consecuencia cu schoolgeld a subi drasticamente y pa 2015 nos por spera mas cortamento den presupuesto di enseñansa. Ora bo wak e manera con ta gobernando, nan ta parce mas un grupo di makkelaars manera defunto Herman Wiels a categorisa nos Prome Minister sr. Mike Eman.

Incertidumbre
Mientras cu nos Promer Minister ta pronkia cu su vision di durabilidad y sostenibilidad nos por wak con Colegio San Nicolas nos hobennan ta pasando den momentonan dificil. Den December mi persona den rueda di prensa a haci un peticion na nos Minister di Enseñansa Sra. Michelle Hooyboer-Winklaar pa por laga controla si e localidadnan di Arubanita por ta contamina cu asbest. Diripiente por a tuma nota di declaracionnan di dokter Salazar, DTI pero niun kier tuma responsabilidad, pero mas bien ta tir’e riba otro. Mientras tanto nos hobennan di Colegio San Nicolas, docentenan ta sigui traha den incertidumbre mirando cu di parti di gobierno ta neglishando hopi mes.

Problema di asbest
Mi tin di elogia rectorado pasobra nan a haci nan trabao como debe ser di informa Minister, pero esaki no a pone atencion debido, kizas pasobra probablemente nos minister tin otro prioridadnan (Y su persona no por bisa - manera ta e caso di San Antonio – cu e no sa ki ta pasando, mientras cu ta e mes a bishita e school cu un grupo yen di camera y tabata sa di e situacion aki). Esaki a conduci cu rectorado a manda un carta na mayornan pa avisa nan di e problemanan cu e localidadnan na Arubanita, unda cu e lugar ta ahigienico y probablemente cu problema di asbest. Mientrastanto ainda no a haci e testnan necesario pa wak si enberdad esaki ta e caso. Y si esaki ta e caso (segun mi cu esaki por ta e caso mirando con kibra e dak ta) lo ta na su lugar pa e Minister di Enseñansa hunto cu tur su coleganan tuma nan retiro mirando con nan a neglisha cu salud di habitantenan, studiantenan y maestronan.

Engaño y mas engaño
Mas tristo ta cu prioridad robes ta sigui. Aña escolar nobo rector di Colegio Arubano San Nicolas a anuncia cu hopi entusiasmo cu lo cuminsa cu un edificio nobo di dos piso y unda cu a cuminsa cu un destaho publico. Pero lamentablemente a informa rectorado cu esaki no lo sigui mas debi cu no tin placa. Pero mas lamentable ta cu ta sacrifica alumnonan di Maria Regina School pa por bay acomoda esnan di Colegio, pero tambe ta exigi IBISA pa duna cierto espacionan pa por acomoda studiantenan. Mi ta kere cu cuerpo di docentenan hunto cu rectorado no por kere e hendenan aki mas pasobra no ta prome biaha cu nan ta ser engaña. Na 2010 ex-Minister di Enseñansa Arthur Dowers a promove hekwerk pa siguridad pero te dia di awe su gobierno no a cumpli.

Negligencia
Danki cu gobierno di MEP a laga traha e edificio di dos piso, sino awe cos lo ta pio. Pero mas tristo ta cu diahuebs 15 di januari por wak cu cierto parlamentarionan a bin school hunga comedia manera cu nan no sa nada, mientras cu un di nan su casa ta docente na Colegio Arubano San Nicolas cu pa hopi tempo caba e parlamentaria aki ta na altura kico ta pasando. Pero a neglisha e asunto, y awo cu esaki a ser exponi ta core bin manera yo no fui. Mi ta kere cu a yega momento pa pidi retiro di e grupo di gobernantenan aki cu ta mas bien negoshantenan cu ta inverti den proyectonan cu beneficionan y nan no ta sirbi interes di pueblo y principalmente interes di nos hobennan. Ta di condena con nan ta neglisha cu salud di studiantenan, docentenan y habitantenan. Pesey mi ta roga oposicion pa yama un reunion publico urgente y pa pidi su persona un splicacion pakico ta neglisha salud y ta prefera di inverti den cosnan cu por warda.

Expresionnan haci den e articulo aki no necesariamente ta refleha opinion di ArenaPoliti.co