Elton Lioe-A-Tjam (ABO): Bonbini partido POR
En conexion cu fundacion di e partido politico Pueblo Orguyoso y Respeta (POR), directiva di partido Aruba su Bienestar Organisacion (ABO), funda dia 10 di december 2014, ta manda palabranan di pabien y ta desea e partido nobo exito.
Ta bisto cu campaña electoral pa eleccion 2017 a cuminsa. Partido ABO for di awor caba, kier haci uzo di e oportunidad tambe pa desea forsa y exito na tur otro partido politico (RED, UPP, AVP, MEP, PPA y kisas algun otro nobo), cu lo participa na eleccion 2017.
Partido ABO ta consciente cu ta trata aki di contrincantenan den arena politico, sinembargo partido ABO ta spera cu tur partido lo hiba un campaña na nivel, un campaña cu ta respeta e dignidad y e mente independiente di e electorado. Un campaña cu ta digno di e pueblo. Pa es motibo aki, partido ABO ta urgi pa e ley riba financiamento di partidonan politico wordo implementa prome cu eleccion, pa asina pueblo lo haya sa di unda e fondonan ta bin pa e campañanan miyonario di algun partido politico. Pa asina pueblo haya sa cua partido ta independiente y cu realmente kier sirbi e interes di pueblo, y cua partido ta mara caba na un patrocinado y su interes.
Bonbini partido POR.
(www.aboaruba.org, This email address is being protected from spambots. You need JavaScript enabled to view it.)
Expresionnan haci den e articulo aki no necesariamente ta refleha opinion di ArenaPoliti.co