Parlamento di Aruba a reuni den un reunion solemne pa nos Gobernador nobo, Su Excelencia Alfonso Boekhoudt, por presenta su credencialnan conforme locual e Reglamento di Gobernador ta stipula. Durante e reunion SE Boekhoudt a duna un discurso elocuente den cual a enfatisa e importancia y forza cu e nucleo familiar tin pa nos comunidad y Pais por progresa. Nos ta gradici nos Gobernador pa e mesahe bunita aki y ta haci un apelacion na Pueblo pa scucha e discurso di nos Gobernador Boekhoudt y tuma tempo pa refleciona riba su mensahe. E reunion solemne tabata uno bunita, pero mester bisa cu ta lamentabel cu Gabinete Eman a presenta cu solamente 3 minister enves di e 9 ministernan cu mester a bin Parlamento pa brinda nan respet na nos Gobernador Boekhoudt na ocacion cu e ta cuminsa fungi den un pocicion asina importante pa nos Pais. Pero como un Pueblo culto cu semper sa di brinda respet na nos Gobernador, nos ta haci un apelacion pa no sigi e mal ehempel di Minister Eman y su bende y recibi y trata nos Gobernador Su Excelencia Alfonso Boekhoudt cu e debido respet. Cu Dios por brinda nos Gobernador Boekhoudt y su famia e sabiduria, pasenshi y forza pa cumpli cu e trabou importante aki pa nos Pueblo y Pais den Reino Hulandes. Bon Bini na su Excelencia Gobernador Alfonso Boekhoudt! 

Expresionnan haci den e articulo aki no necesariamente ta refleha opinion di ArenaPoliti.co