MEP: Mas ofensa di Eman pa Gobernador nobo di Aruba
Cumpliendo cu e Reglamento di Orden di Gobernador, Parlamento di Aruba a recibi Su Excelencia Gobernador sr. Alfonso Boekhoudt den un reunion solemne pa asina e Gobernador nobo por presenta su credentialnan. E reunion publico aki ta tuma lugar den presencia di miembronan di Parlamento, miembronan di Colegio Halto di nos Pais, ex Gobernadornan, ex Presidentenan di Parlamento, Hefe di Departamentonan di Gobierno, Secretaria di Conseho di Minister, Ministernan di Gabinete Eman y demas invitadonan.
3 Minister so a presenta
Remarcabel ta cu Gabinete Eman a presenta na e reunion cu solamente 3 minister. Di 9 minister ta 3 so a presenta na e reunion publico pa yama SE Gobernador Boekhoudt bon bini den e funcion importante aki pa nos Pais. Esaki ta un falta di respet grandisimo di Mike de Meza, Michelle Hooyboer, Arthur Dowers, Alex Schwengle, Angel Bermudez y Benny Sevinger kendenan a keda sin presenta na e reunion. Ta Eman, Richard Arends y Paul Croes so a bin sinta cu cara zuur den Parlamento pa caba di mustra nan malcontento. Un berguensa nacional!
Mas ofensa di Eman
Asina aki Mike Eman ta bolbe ofende nos Gobernador nobo y ta mustra e rabia cu e tin cu Hulanda no a considera ningun di Eman su hendenan y a nombra Su Excelencia Boekhoudt pa e pocicion importante aki.
Aruba mester union y trankilidad
Ta parse cu Mike no ta compronde cu Aruba mester di union y trankilidad enves di rabia, odio y divicion. Pesey Pueblo mester pensa bon si nos kier sigi cu un gobierno cu ta blo busca problema den Reino y cu un Minister President cu no por domina su rabia y ta pone Aruba su cara constantemente na berguensa. Aruba mester union y trankilidad y no tin lugar pa mas locura y divicion di Mike Eman.
Expresionnan haci den e articulo aki no necesariamente ta refleha opinion di ArenaPoliti.co