E partnernan den Dialogo Social a tene un encuentro siman pasa pa conmemora e di cinco aniversario di e di prome Dialogo Social na 2010, unda nan a firma un “acuerdo madre”, esta Keerpunt 2010. Richard Arends, kende ta consehero na Ministerio di Asuntonan General y Asuntonan Economico, a splica cu den e acuerdo aki a subraya cinco punto di interes nacional, cual a evoluciona den diferente protocol cu ta vigente te cu awe.

Dialogo Social ta trece hunto partnernan social, esta organisacionnan di trahadonan, organisacionnan di esunnan cu ta provee oportunidadnan di trabao y gobierno pa dialoga tocante y yega na protocolnan pa cu topiconan di interes cu ta concerni henter nos comunidad. Arends a añadi cu ta pa medio di Dialogo Social a yega na protocolnan entre otro pa limita riesgonan riba tereno di finansa publico; pa mehora e poder di compra di cuidadanonan; y pa mehora e clima di inversion na Aruba.

Tin dos Dialogo Social pendiente pa tuma luga proximamente ora cu e ciclo di reunionnan pa 2015 cuminsa, esta e dialogo tocante educacion y esun tocante vitalidad, segun Richard Arends. El a splica cu e aumento di edad di pensioen di 60 pa 65 aña ta trece cune cu hendenan mester traha mas largo y tin un comision trahando riba con pa prepara pa adapta na e situacion nobo aki.

Tin retonan compleho y diferente factor cu mester tene cuenta cu ne. Con pa saca miho probecho di e cinco añanan adicional den bida laboral y con pa combina esaki cu esunnan cu ta drenta mercado laboral, ta dos di e preguntanan cu e comision ta trahando riba dje pa presenta solucionnan den e sesion cu mester tuma luga den e periodo nos dilanti, Richard Arends a conclui bisando.

Expresionnan haci den e articulo aki no necesariamente ta refleha opinion di ArenaPoliti.co