Den e ultimo simannan e palabra “hedging” ta uno masha popular y usa. Pero kico den realidad ta nifica hedging? Con hedging mester wordo ehecuta? Sigur ta preguntanan cu pueblo mester sa pa por saca su conclusion concreto riba e decision cu WEB a tuma cu consentimento di Gabinete Eman relaciona cu e prijs di crudo a cay drasticamente pero no tawatin alivio den tarifanan di utilidad pa e ciudadano. Den e comunicado aki nos lo splica mas di “hedging” y duna detayenan relevante cu pueblo mester haya sa.

Hedging ta proteccion
E ta un hecho cu prijs di crudo no ta stabil y ta uno volatil. E ta volatil den e sentido cu e prijs ta uno cu por fluctua y no ta mara specificamente na un cierto periodo. Den e cuadro di esaki companianan di utilidad por haci uso di e tool di “hedging”. Hedging ta nifica proteccion! Esaki kiermen tuma un posicion pa reduci riesgo. Cu hedging e ta posibel pa acorda un prijs fiho pa e bari di heavy fuel oil cual lo nifica mara/lock e prijs. Si resulta cu despues e prijs mundialmente subi lo nifica cu abo tin un ventaha pasobra bo a acorda e bari na un prijs mas abou. Contrario na e aumento di prijs, si tin un caida esaki ta na bo desventaha pasobra ya bo a palabra cierto prijs caba (den e acuerdo) cu bo mester paga. Den e siguiente 2 alineanan cu ta sigui nos ta describi 2 scenario (e scenario y cifranan ta ficticio).

Ventaha hedging
Ban pone cu pa reduci e riesgo compania “Coriente pa pueblo” a dicidi di tuma un posicion y sigura (lock) e prijs pa bari di crudo na 40 dollar (spot price = prijs actual) pa un periodo di 2 aña pa 100 mil bari pasobra pronosticonan a mustra cu prijs lo bay subi. Seis luna despues a resulta cu e prijs enberdad a subi cu 10% y bira 44 dollar. Si bo haci e siguiente calculacion: (44-40) lo nifica cu bo a sali gana 4 dollar pa cada bari y den total lo bo a spaar 400 mil dollar na gasto di heavy fuel oil door di reduci bo riesgo y proteha bo mes na subimento di prijs.

Desventaha hedging
Na otro banda tin e posibilidad cu e prijs por baha tambe. Den un scenario cu e prijs a drop cu 10% un aña despues y bira 36 dollar lo nifica cu bo a perde e posibilidad di sali cu un beneficio pasobra e prijs a bira mas barata. Si bo haci e siguiente calculacion: (36-40) lo nifica cu bo a sali 4 dollar perdi pa cada bari y bo a perde e posibilidad pa spaar 400 mil dollar total na gasto di heavy fuel oil. Algo hopi importante pa remarca ta cu bo ta mara pa 2 aña y ni maske con drastico e prijs di bari sigui cay lo bo no tin beneficio di dje (dus pueblo tampoco)!

Caida prijs di crudo
Ta berdad cu ”It’s all about risks”, pero no mester lubida niun rato so cu e ta un hecho cu bo ta tratando algo cu ta volatil (dus cu prijs ta cambia constantemente) y hustamente  pa e motibo aki bo mester ta cauteloso.  Ademas mester pone enfasis riba e hecho cu pronosticonan for di algun tempo pasa caba tawata indica cu prijs di crudo lo bay conoce un caida drastico. Pa e motibo aki tur analisisnan disponibel mester a wordo tuma bou di consideracion ora di bay tuma cierto decision (por ehempel e actual “hedging” di WEB). Esaki caba mester pone tanto Gabinete Eman y WEB realisa cu tawata hopi mas conviniente pa “hedge” a corto plaso.  Loke cu ta den discusion awor na Aruba ta e hecho cu a hedge na 80 y pico dollar mara na un cierto volumen cu aparentemente lo por ta vigente te fin di aña 2016. Actualmente e prijs di crudo ta bou di 50 dollar. Esaki ta un diferencia di mas o menos 30 dollar cu lo por a significa miyones di florin cu lo por a wordo gespaar den gastonan operacional cual lo mester a resulta den un reduccion drastico di tarifanan di utilidad manera e prijs di coriente. Esaki sin duda lo por tawata un alivio grandi pa e ciudadano pero lamentablemente no ta e caso.

Desaroyo di prijs di crudo
Desde 2012/2013 caba diferente analista tawata predici y pronostica cu e prijs di crudo lo bay bira hopi volatil. Den diferente articulo di revistanan economico (manera the Economist, Forbes, oil-crude.net) a informa por ehempel cu e prijs di crudo a cay mas cu 40% entre juni 2014 pa december 2014 y lo continua e mesun tendencia debi na diferente factor entre otro, Merca su produccion a redobla den ultimo 6 añanan, OPEC no ta dispuesto pa interveni y stabilisa e prijs di bari. Asina tin hopi otro factor cu ta wordo treci dilanti indicando cu por lo pronto e prijs di crudo lo no bay subi drastico bek. A base di esakinan y hopi otro fuentenan bo mester tawata mas cauteloso con bo ta bay hedge!

E realidad ta cu awor rond mundo tin reduccion di prijs di utilidad door cu prijs di crudo a baha y pueblo di Aruba mes no por a logra haya un beneficio real di esaki! Pa colmo hasta durante cu prijsnan mundial tawata baha, asina mes WEB y Gabinete Eman a acorda un aumento di prijs di 15% na oktober  2014 cual te dia di awe no tawatin sentido. A base di loke nos a presenta ta obvio cu Gabinete Eman y WEB nunca mester a hedge riba termino largo sino mester a opta pa “hedge” a corto plaso sabiendo e pronosticonan. Ta di condena cu awor ta e humilde pueblo tin cu sigui carga un peso infunda y inhusto!

Expresionnan haci den e articulo aki no necesariamente ta refleha opinion di ArenaPoliti.co