“Gobierno a introduci reformanan structural grandi na 2014 pa adresa e retonan fiscal. Prome, como resultado di e pensioen general (AOV), a hisa e primanan y a inicia cu un aumento di edad di pensioen pa 65 aña den forma gradual. Na di dos lugar, e deficit grandi di pensioen pa empleadonan publico (APFA) a wordo elimina, e periodo di ampliacion y contribucion di franchise a keda modifica y mescos cu AOV e edad di pensioen ta hisa gradualmente. Na di tres lugar, un impuesto a wordo introduci pa parcialmente compensa e gastonan fiscal di e aseguro medico general (AZV).” Cu esaki IMF ta accentua cu e decisionnan tuma door di gobierno di Aruba hunto cu a partnernan di Dialogo Social tabata esunnan corecto. Nan e percura pa e recuperacion economico cu Aruba ta pasando aden awor. Gobernacion prome cu Gabinete Mike Eman I y II nunca a duna prioridad na e fondonan di AOV, AZV y APFA. Awe ta keda constata door di IMF cu e cambionan haci tabata necesario.

For di aña 2010 Gabinete Mike Eman a cuminsa cu combersacion y deliberacionnan cu partnernan social den Dialogo Social pa hunto rescata e tres fondonan cu ta esencial pa Aruba, AOV, AZV y APFA. Prome cu e ley a yega Parlamento di Aruba ta masha hopi trabou a wordo haci riba e tereno aki pa por a yega na e cambionan necesario.

Pa loke ta e fondonan di pensioen AOV y APFA y seguro medico general AZV reformanan structural mester a wordo haci pa e fondonan aki bira duradero y stabil.  Pa motibo di cambionan den populacion, hende ta biba mas largo y tin menos hoben pa yuda carga cu e diferente primanan. Tin un liña consistente di presion extra riba e fondonan pa por keda carga e poblacion cu ta birando mas grandi. Edad di pensioen y e situacion di e fondo di pensioen di SVb y e prima a lanta un discusion nacional na Aruba. Gabinete Mike Eman I a individualisa e prima di AOV cu a yuda su entrada, mescos a cambia e premiegrens loke a nifica cu esnan cu ta gana mas ta paga un poco mas pa di e forma aki yuda e fondo di AOV. Un otro cambio cu Gabinete Mike Eman I a haci ta den e base.  Tur esaki a yuda e fondo di AOV. Mester remarca cu durante e reunionnan di Dialogo Social e tema cambio di edad di pensioen a haya sosten amplio. E aumento di edad di pensioen ta subi gradualmente for di inicio di e aña aki.

E ahustenan necesario pa por garantisa e fondo di pensioen di APFA y haci esaki duradero a wordo introduci. Aki tambe ta hisa gradualmente edad di pensioen di ambtenaarnan di 60 pa 65 aña. Esaki a keda dicidi den Parlamento di Aruba pa medio di un decreto gubernamental  den un sesion largo aña pasa. Resultado ta cu pensioenfonds di e empleado publico APFA ta cubri 100% atrobe. Cu esaki existencia di e fondo ta keda garantisa pa futuro.

Gabinete Mike Eman I a haci reformanan grandi caba cu e pensioen di empleadonan publico. Na prome lugar a corta severamente den e areglo di pensioen di mandatarionan.  Despues a cambia e areglo di ambtenaarnan di eindloon pa middelloon, a inclui e franchise y edad di pensioen a subi di 55 pa 60 aña. Cu un solo deposito di capital di 170 miyon, e herstelpremie ta cambia di 3% riba 15% y APFA ta cubri bek cu 100% (dekkingsgraad).

IMF a constata den su declaracion cu e reformanan aki tabata husto y necesario pa tuma. E ta elogia gobierno di Aruba pa pasonan tuma aki. Pasonan cu a pone Aruba riba e bon caminda.

Expresionnan haci den e articulo aki no necesariamente ta refleha opinion di ArenaPoliti.co