Gabinete Eman a bin ta tuma un cantidad di medida pa nan por drecha e disaster cu nan a haci cu e finanzas publico di e Pais aki. Sinembargo IMF den su rapport preliminario a adverti Gabinete Eman cu e medidanan aki no ta suficiente. Pa e motibo aki Gabinete Eman a priminti IMF cu nan lo tuma extra medida.

Medida tuma no tabata suficiente
Den punto 4 di e rapport di IMF nan a splica cu Gabinete Eman a tuma medida pa baha su gastonan den compra di servicio y producto y tambe pa baha e gastonan cu gobierno tin cu APFA. E medidanan aki a trece placa den caha di gobierno, pero asina mes e debe di nos Pais a surpasa 80% di nos GDP. Pues di cada florin mas di 80 cent ta bay pa paga debe. Un situacion na unda cu no ta resta placa pa gobierno inverti den necesidadnan basico di nos Pais. Banda di esaki den punto 5 di e rapport, IMF ta splica cu den 2014 a bolbe tuma medida pa hisa prima di AOV, hisa edad di pensioen, corta den beneficio di pensioen di APFA y hisa BBO pa AZV. Pero e medidanan aki no tabata suficiente pa por drecha nos finanzas publico na e nivel cu Gabinete Eman a haye na 2009.

Mas medida den 2015
En bista di esaki Gabinete Eman a priminti IMF di bay tuma extra medida den 2015. IMF den punto 6 di e rapport a describi e medidanan aki como ‘meaningfull fiscal consolidation,’ indicando cu ta trata aki di medida severo cu Gabinete Eman lo tuma pa por baha su deficit presupuestario. Gabinete Eman a informa IMF cu lo trata di medida pa corta den gasto di salario y reduci e cantidad di trahador publico. Banda di esaki den punto 8 IMF ta mustra cu Gabinete Eman lo tin cu subi BBO y lo mester bay tuma mas medida pa gobierno no mester contribui mas na AZV.

IMF tin duda
Mester remarca cu IMF tin duda di locual Gabinete Eman ta trece dilanti como solucion. IMF ta indica den punto 7 di e rapport cu Gabinete Eman su plan di medida ta ambicioso y nan mester ta determina pa por bay tuma medida di awor te cu 2017 pa asina por logra yega na un surplus chikito na 2018 y trece e debe na 70 cent di cada florin. Segun IMF cu e medidanan cu Gabinete Eman ta propone awor, e no lo logra su meta. Si no bin extra medida, e deficit lo keda grandi y e debe lo keda halto.


18 februari 2015

Expresionnan haci den e articulo aki no necesariamente ta refleha opinion di ArenaPoliti.co