Mi a sigui e rueda di prensa di minister Schwengle, y mi tin di admiti cu mi "gemoed" a casi yena ora mi a wak e minister ta declara cu e no lo bay tin weekend ni tampoco vakantie mas ora e bay fungi parttime como longarts.
Mi tin di admiti tambe cu mi mester a seca un lagrima ora e minister a laga sa cu e no sa si e lo por cumpli cu su trabou como minister y esun di longarts, y cu e lo tin un decision hopi dificil pa haci si e yega na e punto aki.

Unda tur e "bravour" a keda diripiente di un minister cu a bisa di kier bira fulltime politico y cu lo e haci su maximo esfuerso pa defende e derecho di e patient pa un mihor cuido.
E minister lo a ripara cu e a faya como minister y awor kier regresa, y asina perhudicando un yiu di tera cu SÍ  kier traha como longarts.

Ta obvio cu e minister ta gusta tira culpa riba otro hende, pasobra den su declaracion e ta laga sa cu mucho hopi patient ta wordo referi na un longarts na Aruba, implicando cu e dokter di cas no sa su trabou, y cu e patient ta exagera su keho pa e yega cerca un specialista.
Straño ta cu e minister den pasado como longarts tabata papia otro "lenga", indicando cu mester mucho mas specialista na Aruba, esaki ta dia cu ela traha un manpowerplanning tempo cu e tabata traha den HOH. Y esaki ta documenta.

By the way, lo ta interesante pa sa kiko e lo bay haci ora e haña su retiro como minister door di pueblo, pasobra lo tin dos longarts trahando na Aruba, y no lo tin trabou p'e tampoco. Of lo e bay despedi e colega di Surnam cu awor aki a reemplase?
Den su declaracion ela bisa cu 60% di e patientnan cu ta bay longarts, ta bay pa Asma of COPD, cu un huisarts mes lo por wak. Y na Merca solamente 5% di e tipo di patientnan aki ta bay un longarts. Si esey ta e caso, anto de facto ta 1 longarts so mester na Aruba. Esaki ta completamente otro cu loke e mes a pone den su manpowerplanning. Dicon un cambio asina grandi?? Ta un hustificacion e ta busca pa stroba dr. Lejuez-Becker bin traha na Aruba?
Den mi concepto no tin ningun hustificacion pa AZV no ofrece dr. Lejuez-Becker un trabou como longarts na Aruba.

Banda di e aspecto un poco humoristico y hopi insincero den su declaracion, tin algo hopi serio cu ela bisa cu nos mester tene debido cuenta cune, esta na unda ela bisa cu e lo bay traha tur dia despues di trabow, den weekend y alabes den su vakantie. E pregunta ta cu si esey no por ta un peliger pa e patient, door di e cansancio di e minister?
Loke sr. Schwengle tin di haci, ta laga su ego un banda y haci pueblo un fabor y baha como minister.
Ya e no ta un peliger pa pueblo, ni como minister ni como dokter.

                
Den nomber di Union Patriotico Progresista – U.P.P.
Candelario A. S. D. – Booshi – Wever
Brazil, februari 24, 2015

Expresionnan haci den e articulo aki no necesariamente ta refleha opinion di ArenaPoliti.co