ACCION "ORA CERO" PA PARA DESMANTELACION

San Nicolas -- Partido MEP diabierna anochi durante un reunion extra ordinario cu caracter di urgencia a convoca imediatamente un accion dilanti gate di Valero pa demostra cu nan ta serio den nan demanda pa para e desmantelacion. Un grupo di al rededor di 700 persona cu a acudi na Santa Cruz, a bai mesora pa gate principal di Valero.
Durante e reunion e miembronan di partido MEP a aproba e plan di accion "ORA CERO" y imediatamente, dilanti di tur presente lider di MEP Evelyn Wever-Croes a manda carta pa gobierno pa exigi di nan un rol mas activo den re-apertura di refineria. Pa nan forsa Valero pa bende e refineria, y si Valero no actua di buena fe, pa kita e refineria di Valero pa nos mes busca cumprado.
Un rato despues, Wever-Croes a manda otro carta dilanti tur presente, e biaha aki na Valero pa urgi nan para e desmantelacion y informando nan cu militancia di MEP ta bai para na gate di Valero pa warda un contesta.
Mesora despues a hasi un yamada pa tur hende bai na porta di Valero, pa forma un cadena humano na e gate. E accion aki a dura te pasa di 1 or di marduga, y mester bisa cu tabata tin un grupo masha grandi presente. Autonan tabata staciona bastante mas leew di e gate di refineria.

Lider di MEP Evelyn Wever-Croes a indica cu e prome fase di accion "ORA CERO" tabata exitoso, y a pidi tur hende pa keda pendiente pa e yamada pa fase 2. Accion "ORA CERO" ta un cadena di accion, y cada paso lo conose un intensidad mas grandi.
"Re-apertura di e refineria ta nos unico salbabida. Ya turismo su so no por sigi carga nos economia, gremio hotelero a bisa nos esey. Re-apertura di e refineria ta un alternativa pa e medidanan cu Mike Eman tin pa suta pueblo cun'e. Ami ta puntrabo: si bo tin dos opcion, e prome ta re-apertura di refineria, cu ta crea cupo di trabou, crea entrada pa gobierno, y garantisa stabilidad di nos florin, e di dos opcion ta medida tras di medida, cual abo lo scohe? Nos ta scohe pa e alternativa, no pa e medida!" palabranan di Evelyn Wever-Croes. MEP no a haya contesta ainda di Gobierno ni di Valero, y lo duna nan algun ora mas, y despues lo pone den ehecucion e fase 2 di e plan di accion "ORA CERO".
Remarcable tabata cu no ta solamente hendenan di MEP tabata tey presente, sino varios cara conosi den comunidad cu nunca antes a sostene MEP abiertamente. Tur tabata satisfecho pa e papel agresivo cu MEP y su lider a asumi, y ta sinti cu tin speransa atrobe. Miembronan di MEP tabata bisa cu ta MEP mester a percura pa re-apertura na 1990 y awor atrobe ta MEP lo percura p'e.

Expresionnan haci den e articulo aki no necesariamente ta refleha opinion di ArenaPoliti.co