E reunion publico tocante di e forma cu WEB ta cumpra 'fuel oil' pa genera coriente ("hedging") a demostra un biaha mas e forma di traha di MEP. Enbez di presenta argumento pa sostene nan punto di bista, nan a keda pega den acusacion sin preuba y insinuacion sin base. Enbez di exigi orden den e reunion cu nan mes a pidi p'e, pa asina nan mustra con segun nan si mester maneha WEB, MEP a instiga nan simpatisantenan den tribuna publico pa hunto cu nan mes crea un enorme desorden durante di e reunion. Mescos cu MEP ta instiga sin argumento pa desorden, menasa y intimidacion den comunidad, nan a instiga desorden den parlamento. Ni e lider di MEP mes bo por a scucha ora e tabata na palabra. Pa preuba cu MEP ta recuri na gañamento so den tur asunto y no solamente den e caso di WEB di siman pasa, ata aki algun otro tema cu MEP mes a pone den discucion ultimo lunanan.

Desmantelacion di Valero: MEP ta contra di desmantelacion di e refineria. Pero mientras cu nan ta bisa cu nan si tin cumprado pa e refineri y cu pa nan si portanan ta habri, te awe nan NO a presenta niun cumprado. Dia cu mester a sostene e ley pa habri e refineria despues di cinco aña sera, MEP a vota contra. Mientras cu tur experto ta conseha cu no por haya hende pa cumpra e refineria pasobra entre otro e ta mucho bieuw, MEP kier habri'e. Pero e mes un MEP -incluso e lider mes - a declara siman aki cu Valero mester "co'i e refineria y bay for di Aruba cun'e". MEP ta gaña cu nan tin cumprado y MEP ta gaña cu nan kier e refineria na Aruba. E unico cos cu MEP kier ta desorden!

RENOBACION DI HOSPITAL
For di comienso di e proyecto di renobacion di e hospital, MEP a lansa e acusacion cu tur esnan envolvi den e proyecto ta corupto. Sin presenta niun tiki preuba, MEP a keda insisti den e acusacion. E splicacion detaya di e  directornan Arubiano di e organisacion SOGA cu MEP mes a crea, no a pone nan recapacita. Informacion detaya riba e proceso pa scohe e compania di construccion door di expertonan, no a pone MEP reconsidera nan posicion. E echo cu 16 banco local y internacional ta financia e proyecto grandi aki y nunca lo a hinca nan mes den un proyecto corupto, no tabata suficiente pa mustra MEP cu nan ta fout. Nan ta insisti den nan gañamento pa causa duda y inseguridad.

EXITO DI TURISMO
Ni cuanto expertonan Arubiano y di exterior splica con exitoso turismo di Aruba ta, MEP ta keda gaña cu e ta bay malo. Ni cuanto cifra di instancianan local y internacional manera IMF mustra con bon ta bayendo cu turismo na Aruba, MEP ta sigui gaña cu cos ta bayendo malo. Danki Dios cu turismo bou maneho di Otmar Oduber ta bayendo asina bon! E ta e curason y forsa di nos economia. Turismo ta loke tin nos ta crece como pais. Apesar di esey MEP ta sigui gaña cu e ta bayendo malo.

ENERGIA
Expertonan rond di mundo ta elogia e maneho di gobierno pa Aruba bira mas independiente di petroleo y e aumento constante di prijs di awa y coriente cu e ta causa. Nan ta elogia e esfuersonan pa nos usa mas energia renovabel manera solo y biento, cu ta reduci substancialmente e sushamento di medio ambiente tambe. Apesar di cu e unico forma pa realmente bira independiente di petroleo y logra stabilidad di prijs di awa y coriente a largo plazo,  ta pa usa energia renovabel, MEP ta sigui insisti pa stop cu desaroyo di energia removabel manera cu mulinanan di biento y panelnan di solo. MEP ta gaña cu ta miho pa nos core un cabel for di Colombia pa haya coriente barata. MEP no ta bisa cu nos lo bolbe depende di otro gobierno di otro pais pa nos energia. MEP ta bolbe gaña pueblo.

Asina por sigui cu mas ehempel di e gañamento di MEP. Di berdad: desorden y gañamento a remplasa orden y argumento serca MEP. E degeneracion di MEP ta asombroso y no tin hende den MEP cu ta lanta pa para e degeneracion aki.

Expresionnan haci den e articulo aki no necesariamente ta refleha opinion di ArenaPoliti.co