Durante di tratamento di e presupuesto di Conseho Consultativo pa 2015, e fraccion di MEP a bolbe mustra e caracter real di e partido. Tur hende a corda con den pasado MEP a bisa trahadornan cu cos ta malo y pesey no a paga nan beneficionan. Pero na mes momento a co'i 28 miyon florin di pueblo y parti pa famia y amigonan. Esaki a wordo considera un di e traicionnan y forma mas falso di traha di MEP. Durante di e tratamento di presupuesto di Conseho Consultativo, MEP a demostra cu e caracter falso tey semper bay. Durante di henter di e reunion e fraccion di MEP a elogia e Conseho Consultativo. A gaba nan trabou. Pero ora di vota pa e presupuesto y realmente sostene nan trabou diario, MEP a vota CONTRA di e presupuesto. Totalmente sin motibo! Pasobra na ningun momento, niun di e miembronan di MEP a bisa ni un palabra riba e presupuesto. Nan sa masha bon cu e unico forma pa e Conseho Consultativo por sigui haci su bon trabou, ta door di aproba e presupuesto di e instituto estatal aki. Sinembargo na e momento crusial aki MEP a laga e instituto cu tanto nan ta gaba cay manera un patia hecho. Door di cu e miembro di partido PDR no tabata presente, ta danki na e fraccion di AVP cu e Conseho Consultativo por sigui haci su trabou. E fraccion di AVP completo si a vota pa aproba e presupuesto di e Conseho Consultativo.

MEP a demostra su falsedad atrobe. Nan a elogia e trabou y rol importante di e Conseho Consultativo yen di palabra bunita, pero ora di vota pa nan presupuesto MEP ta vota CONTRA. Sin duna niun motibo pakico nan no ta sostene e instituto importante aki. Enbez di sostene e bon trabou di e Conseho Consultativo, MEP ta bira lomba y demostra nan falsedad atrobe. E caranan di e lidernan di MEP a cambia, pero e mentalidad falso a keda mescos.

Expresionnan haci den e articulo aki no necesariamente ta refleha opinion di ArenaPoliti.co