E reunionan di presupuesto a continua e siman aki y e ministerio di asuntonan social-labor y hoben tawata na turno. Durante e reunion aki parlamentarionan di MEP a pone hopi atencion riba e aspectonan di  Otorgamento di permiso, desempleo, ampliacion di ministerionan y nos muchanan. Parlamentario Dangui Oduber a elabora riba un rapport di Sociaal Economische Raad. E parlamentario a trece lo siguiente padilanti : “E investigacion di SER ariba e Werkloosheid y Arbeisimmigratiebelid a focus riba permisonan zonder werkverbod. Permisonan zonder werkverbod ta permisonan cu mester haci un peticion pa trabou pa nan. Minister Paul Croes a stipula un maneho y ora bo lesa e rapport di SER bo por conclui cu NO tin maneho. Al contrario, bo ta conclui cu ta free for all tin. SER ta conclui di e maneho y di e peticionan cu ta wordo haci: Menos cu 10% di e peticionan pa drenta Mercado laboral ta pasa via Departamento pa Labor pa un toetsing riba e Mercado laboral. Esaki ta simplemente increibel pa kere. Mi no por conclui otro cu ta fiesta di permiso tin. Ki splicacion un minister por tin cu uitzondering a bira regla. Ki splicacion minister por tin cu 90% di e peticionan no ta wordo getoests pa DPL.”

Lider di fraccion parlamentario Evelyn Wever-Croes a subraya riba e parti di pobresa y cu ampliacion di ministerionan ta costa hopi placa. Lider di fraccion a expresa lo siguiente: “Aruba conose awe un pobresa grandi caba, y awor cu Mike Eman a firma pa Aruba haya su CFT, y e lista di 24 medida di AVP mester wordo introdusi, mi ta teme cu e problema di pobresa ta bira mas grandi. Gobierno a corta den su presupuesto husto na esnan cu tin mas mester di dje, na nos muchanan especial, Casa Cuna, fundacionnan cu mester yuda hende muher den dificultad. Pero di otro banda e gastonan di e ministernan a aumenta cu 17 miyon florin pasobra a bai na 9 minister. Ta obvio cu prioridadnan ta ekiboca. Apesar cu mi a puntra minister cuanto placa mas e mester pa por crea asistencia social pa esnan cu ta biba den pobresa, e minister no a contesta esaki.”

E reunion a continua y parlamentario Ady Thijsen tambe a hiba palabra. Den su disertacion e e temanan calidad di bida y cuponan di trabou a bini dilanti. Parlamentario Thijsen a declara lo siguiente: “Si nos kier duna nos pueblo un calidad di bida duradero cual ta encera stabilidad, trankilidad, y felicidad e parti laboral ta importante. E factor laboral ta hunga un rol hopi importante mes. Lamentablemente  e manho social economico financiero di Gabinete Eman I &II a trece cune cu nos comunidad a kraak. Dus nos ta papia di “ontwrichting van de samenleving”. Gabinete Eman su maneho no ta mantene y tampoco crea cuponan di trabou. Minister Paul Croes no ta pone prioridad pa crea cupo di trabou, combati pobresa tampoco crea oportunidad pa nos hobennan.”

Tambe fraccion a toca e tema di bureau “Sostenemi”. Parlamentario Guillfred Besaril den su disertacion a expresa: “"Bureau Sostenemi a wordo funda entre otro pa por tin un organo mas accesible y menos burocratico na momento di atende cu e problematica di abuso y maltrato di menornan. Legitimidad tabata un problema desde inicio di e departamento. A carga speranza cu e cambio den nos codigo Civil art. 243, lo yuda fortifica e departamento su posicion. E preguntanan cardinal ta: 1. Dicon esaki no a tuma luga ainda 2. Y kiko ta e Minister su pensamento riba e intencion di laga e aspecto di Landelijk Meldpunt Kindermishandeling bolbe resorta, mane tabata e caso 10 aña pasa, bow di responsabilidad di Directie Voogdijraad, mientras cu mayoria Profesional riba e tereno social a coïncidi cu ta miho pa esaki resorta bow di un organo independiente".

Parlamentario Xiomara Ruiz-Maduro a haci pregunta basa riba e conclucionnan di e rapport di SER, Arbeidsimmigratiebeleid & Werkloosheid. Enfasis a wordo poni riba e excepcionnan cu ta wordo duna ora di otorga permiso pa trabou. A pidi Minister Croes splica con bin cu na Aruba no por haya night cleaner, tuinman, autobandmonteur, handy man, dishwasher, security guard y pakiko mester duna permiso urgente y den forma di excepcion pa e funcionnan aki siendo cu tin hende inscirbi na DPL buscando trabou.

Na final minister Croes a papia hopi pero no a contesta tur e preguntanan. E pregunta cardinal cu a keda sin wordo contesta ta, con e protocol cu Mike Eman a firma, ta bai afecta e maneho social y con e ministro ta bai garantisa cu por brinda asistencia social na esnan cu lo wordo afecta pa e medidanan di Mike Eman.

Expresionnan haci den e articulo aki no necesariamente ta refleha opinion di ArenaPoliti.co